"Google" məktəblilər üçün süni intellekti öyrədən oyun təqdim edib

"Google" və "Stanford Accelerator for Learning" birgə yeni tədris platforması — "AI Quests" layihəsini təqdim edib.

"PostMedia" xəbər verir ki, layihə 11–14 yaşlı məktəblilər üçün nəzərdə tutulub və süni intellekti öyrənmə prosesini maraqlı macəraya çevirib.

AI Quests brauzer üzərindən işləyən bir oyundur. Burada uşaqlar kod yazmadan məlumat toplayır, modelləri öyrədir və məlumatların keyfiyyətinin nəticələrə necə təsir etdiyini müşahidə edirlər. Məsələn, ilk tapşırıqda şagirdlər hava və çay səviyyəsi məlumatlarını təhlil edərək daşqınların proqnozunu qururlar.

Layihənin məqsədi uşaqlara süni intellektin necə işlədiyini, məlumatların və insan qərarlarının nəticəyə necə təsir etdiyini anlamağa kömək etməkdir.

Google bu layihə ilə “AI savadlılığı” anlayışını — yəni süni intellekt haqqında əsas biliklərin hər bir şagird üçün vacib bacarıq olmasını təşviq edir. Platforma həmçinin müəllimlər üçün dərs planları və əlavə tapşırıqlarla təmin olunub.

Hazırda yalnız bir tapşırıq aktivdir, lakin tezliklə yeni bölmələr, məsələn, göz xəstəliklərinin tanınması və beyin xəritələşdirilməsi üzrə oyunlar əlavə ediləcək. Tədris hələlik ingilis dilindədir, lakin yaxın zamanda digər dillərdə də istifadəyə veriləcək.