"Ford" və "Renault" Avropada əlçatan elektrik avtomobilləri istehsal etmək üçün birləşir

"Ford" və "Groupe Renault" Avropada əlçatan elektrik avtomobillərinin istehsalını genişləndirmək məqsədilə yeni strateji tərəfdaşlıq elan ediblər.

"PostMedia" xəbər verir ki, bu barədə "Autocar" nəşri məlumat yayıb.

Razılaşmaya əsasən, "Ford" "Renault"nun şəhər tipli kütləvi bazar üçün xüsusi hazırlanmış "Ampr" elektrik platformasına çıxış əldə edəcək. Bu platforma əsasında Avropa bazarı üçün ən azı iki yeni Ford elektrik avtomobili istehsal olunacaq.

Hər iki model Avropanın sərt ekoloji standartlarına uyğun olacaq və onların istehsalı Fransanın şimalındakı "ElectriCity" sənaye klasterində həyata keçiriləcək. Bu mərkəz artıq "Renault"un bir sıra elektrik modellərinin istehsal olunduğu əsas sənaye zonasıdır.

"Ampr" platforması üzərində hazırlanacaq ilk "Ford" modelinin 2028-ci ilin əvvəlində satış salonlarına çıxacağı gözlənilir. İkinci model isə bunun ardınca təqdim ediləcək. Şirkətlər bildirirlər ki, ümumi platformadan istifadə olunsa da, avtomobillər “Ford"un xarakterini və DNT-sini” qoruyacaq – yəni dizayn, idarəetmə xüsusiyyətləri və yol performansı "Ford"a xas olacaq.

Tərəfdaşlıq həmçinin yüngül kommersiya elektrik avtomobilləri və furgonlar üzrə əməkdaşlıq imkanları yaradır. Bu seqment xüsusilə şəhər daxilində çatdırılma xidmətləri və yaşıl nəqliyyata keçid edən şirkətlər üçün sürətlə böyüyən bir sahədir.

Ekspertlərə görə, razılaşma "Ford" üçün strateji əhəmiyyət daşıyır, çünki Avropada rəqabət güclənir, xüsusilə də əlçatan elektrik avtomobili bazarında fəal olan Çin markalarının hesabına. "Renault" platformasından istifadə "Ford"a xərcləri azaltmağa, yeni modellərin bazara çıxma müddətini qısaltmağa və kütləvi elektrik avtomobili seqmentində mövqelərini gücləndirməyə imkan verəcək.