"Mercedes-Benz C-Class" modelində radikal dəyişiklik: universal versiya ləğv oluna bilər

"Mercedes-Benz" öz əsas modellərindən biri ilə bağlı ciddi dəyişiklikləri nəzərdən keçirir.

"PostMedia" "Autocar" nəşrinə istinadən xəbə vei ki, gələcək elektrik "Mercedes-Benz C-Class" modelinin ilk dəfə yalnız sedan kuzovunda təqdim olunması mümkündür və ənənəvi universal (station wagon) versiyası istehsaldan çıxarıla bilər.

Bu qərar qəbul olunarsa, markanın uzun illər formalaşmış strategiyasından əhəmiyyətli dərəcədə uzaqlaşma olacaq. Çünki xüsusilə Avropa bazarında universal modellər həmişə "C-Class" ailəsinin vacib hissəsi olub.

Söhbət C-Class modelinin tam elektrik versiyasından gedir. Bu model şirkətin yeni nəsil elektrik avtomobilləri sırasına daxil olacaq və daxiliyanma mühərrikli versiyalardan yalnız texniki baxımdan deyil, həm də bazarda mövqelənməsinə görə fərqlənəcək.

Məlumata əsasən, şirkət daha çox tələb görən sedan kuzovuna fokuslanmağı düşünür, universal variant isə yeni elektrik xəttindən çıxarıla bilər. Bu yanaşma ümumilikdə avtomobil istehsalçılarının elektrik dövründə model sırasını optimallaşdırmaq strategiyasına uyğundur.

Elektrik avtomobillərinin hazırlanması böyük maliyyə tələb etdiyindən, istehsalçılar daha çox gəlir gətirən və geniş bazara xitab edən versiyalara üstünlük verirlər. Eyni zamanda universal modellər bəzi regionlarda populyar olsa da, qlobal bazarda sedan və krossoverlərə uduzduğu üçün prioritetini itirir.

Əgər bu qərar reallaşarsa, bu, ilk dəfə olacaq ki, "C-Class" model xətti onilliklər boyu mövcud olan universal versiyasını itirəcək. Bununla da elektrik platformasına keçid təkcə texniki dəyişiklik deyil, həm də modelin konseptual yanaşmasına təsir göstərəcək.

Yeni elektrik "C-Class" modelinin markanın digər gələcək modelləri ilə sıx əlaqəli olacağı və müasir texnologiyalar – yenilənmiş platformalar, proqram təminatı və enerji idarəetmə sistemləri ilə təchiz ediləcəyi gözlənilir. Bununla belə, kuzov tipi ilə bağlı yekun qərar hələ verilməyib və universal versiyanın taleyi açıq qalır.