Ermənistan və Azərbaycan arasında iqtisadi təmasların ilk əlamətləri müşahidə olunmağa başlayıb - "Euronews"

Mövcud ixrac göstəriciləri Azərbaycan və Ermənistan arasında ticarətin məhdud da olsa bərpasını göstərir.

"PostMedia" xəbər verir ki, bu barədə "Euronews" məlumat yayıb.

Rəsmi statistikaya əsasən, iqtisadi əlaqələr artıq formalaşma mərhələsinə keçib. Həcm baxımından bu göstəricilər hələ kiçik olsa da, son illərdə sərhədlərarası ticarətin ilk açıq şəkildə sənədləşdirilmiş nümunələri kimi qiymətləndirilir. Azərbaycanın gömrük məlumatlarına görə, 2026-cı ilin birinci rübündə Ermənistana ixracın həcmi təxminən 5,75 milyon dollar təşkil edib.

Eyni dövr üzrə Ermənistanın gömrük orqanları tərəfindən analoji məlumatların açıqlanmaması isə mənzərənin yalnız bir tərəfini əks etdirdiyini göstərir. Nəşr vurğulayır ki, iki ölkə arasında ticarət tarixən çox zəif olub və bu, birbaşa iqtisadi əlaqələrin olmaması, eləcə də uzun illər davam edən regional münaqişələrin təsiri ilə bağlıdır.

Yeni açıqlanan rəqəmlər hələlik sabit və strukturlaşmış ikitərəfli ticarət münasibətlərinin mövcudluğunu təsdiqləmir. Beynəlxalq ticarət bazaları da qarşılıqlı axınları tam şəkildə təsdiqləməyib. Bununla belə, bəzi analitiklər bu dinamikanı mümkün dəyişikliklərin ilkin siqnalı kimi qiymətləndirir.

"Irregular Warfare Initiative" proqramının tədqiqatçısı Bako Xeladze bildirib ki, qeyd olunan rəqəmlər simvolik məna daşıyır: “Bu 5,75 milyon dollar sadəcə iqtisadi göstərici deyil, eyni zamanda ölkələr arasında etimadın formalaşmasına xidmət edən müsbət siqnaldır və gələcəkdə Cənubi Qafqazda sülh və rifaha töhfə verə bilər”.

Onun sözlərinə görə, iqtisadi qarşılıqlı asılılıq post-münaqişə dövrlərində sabitliyin təmin olunmasına tez-tez kömək edir. Ekspert əlavə edib ki, tarixdə iqtisadi əlaqələrin mübahisələrin həllinə və daha sabit mühitin formalaşmasına töhfə verdiyi bir çox nümunə mövcuddur.

Digər ekspert, İstanbul Aydın Universitetinin professoru və BMT-nin İnkişaf Proqramının məsləhətçisi Nurhan El-Bayaa isə bu prosesi daha geniş kontekstdə qiymətləndirərək qeyd edib ki, iqtisadi təmaslar çox vaxt siyasi gərginliyin praktik əməkdaşlıqla əvəzlənə biləcəyinin ilk və ən aydın göstəricisi olur.