BMW Rusiyaya avtomobil tədarükünə “qəti şəkildə qarşıdır”

Almaniyanın "BMW AG" şirkəti bildirib ki, Çindəki bölməsinə Çindən Rusiyaya markaya məxsus avtomobillərin istənilən mümkün ixracına qəti şəkildə etiraz etməsi barədə göstəriş verilib. Eyni zamanda şirkət vurğulayıb ki, əgər avtomobillər alternativ yollarla yenə də Rusiya bazarına daxil olursa, bu, artıq BMW-nin nəzarət imkanlarından kənardadır.

"PostMedia" xəbər verir ki, bu barədə "Reuters" məlumat yayıb.

Bundan əvvəl “Avtostat” analitik agentliyi 2025-ci ilə qədər Rusiyaya 64 min BMW avtomobilinin idxal ediləcəyini bildirmişdi. Onlardan 18 mini yeni, 46 mini isə istifadə olunmuş avtomobillərdir.

"Drom.ru"nun məlumatına görə, Rusiyaya gətirilən yeni BMW-lərin 40,5%-i Çində istehsal olunub.

Xatırladaq ki, bu yaxınlarda Rusiyanın “Avtotor” şirkətinin 2022-ci ilin yazından əvvəl tədarük olunmuş ehtiyat komplektlər hesabına BMW X7 krossoverlərinin yığımını bərpa etdiyi açıqlanmışdı.

Reuters-in qeyd etdiyinə görə, Qərb brendlərinə məxsus yeni avtomobillərin əhəmiyyətli hissəsi Çindən Rusiyaya “istifadə olunmuş avtomobil” adı altında idxal olunur. Bu isə mümkün sanksiya risklərindən yayınmağa kömək edir.