Tramp Qrenlandiya ilə bağlı planlarına qarşı çıxan ölkələri gömrük rüsumları ilə hədələyib

ABŞ Prezidenti Donald Tramp Vaşinqtonun Qrenlandiyaya olan iddialarına qarşı çıxan ölkələri ticarət məhdudiyyətləri ilə hədələyib.

"PostMedia" xəbər verir ki, bu barədə o, "Ağ Ev"də keçirilən tədbirdə bildirib.

"Razılaşmayan ölkələrə qarşı rüsumlar tətbiq edə bilərəm, çünki Qrenlandiya bizə milli təhlükəsizlik üçün lazımdır. Beləliklə, mən bunu edə bilərəm".

Kreml nümayəndəsi Dmitri Peskov adanın ətrafındakı vəziyyəti beynəlxalq hüquq baxımından qeyri-adi adlandırıb. Moskva Qrenlandiyanın Kopenhagenə məxsus olması mövqeyindən çıxış edir.

Qeyd edək ki, bu ərazi 1953-cü ilə qədər Danimarka koloniyası olub. Hazırda Krallığın bir hissəsi olaraq qalsa da, 2009-cu ildə özünüidarəetmə və daxili siyasəti müstəqil müəyyən etmək imkanı ilə muxtariyyət alıb.

İkinci prezidentlik müddətinin əvvəlindən bəri "Ağ Ev" rəhbəri dəfələrlə adanın Birləşmiş Ştatların bir hissəsi olması lazım olduğunu bəyan edib. O, bunun üçün hərbi güc tətbiq etməyəcəyinə dair söz verməkdən imtina edib və onun üçün nəyin daha vacib olması — Qrenlandiya, yoxsa NATO-nun qorunması — sualına birmənalı cavab verməyib.

Yanvarın əvvəlində ABŞ-nin Venesueladakı hərbi əməliyyatından sonra Tramp ada ilə bağlı planlarından daha tez-tez danışmağa başlayıb. Bu fonda, "Ağ Ev" administrasiyası rəhbərinin müavini Stiven Millerin həyat yoldaşı "X" sosial şəbəkəsində Amerika bayrağının rənglərinə boyanmış Qrenlandiya xəritəsini "Tezliklə" başlığı ilə paylaşıb.

Çərşənbə günü Danimarka və Qrenlandiyanın xarici işlər nazirləri Ağ Evdə dövlət katibi Marko Rubio və vitse-prezident Cey Di Vens ilə danışıqlar aparıblar. ABŞ-nin ada məsələsindəki mövqeyini dəyişmək mümkün olmayıb.

Görüşdən əvvəl Tramp Danimarkadan Qrenlandiyanı "tərk etməyi" tələb edib. ABŞ Prezidenti həmçinin NATO-nu adanın alınmasında Vaşinqtona kömək etməyə çağırıb. Onun fikrincə, əks halda ada Rusiya və ya Çinin əlinə keçə bilər.

Rusiya XİN-in rəsmi nümayəndəsi Mariya Zaxarova gərginliyin artırılması üçün bəhanə kimi Moskva və Pekinin Qrenlandiya ətrafındakı guya hansısa "fəallığına" istinad edilməsinin qəbuledilməz olduğunu bildirib.

Aİ ölkələri yanvar ayında Birləşmiş Ştatların təhdidlərinin real olacağı təqdirdə mümkün reaksiya barədə müzakirələr aparıblar. Bu günlərdə adaya Avropa ölkələrindən hərbçilər gəlməyə başlayıb, lakin "Ağ Ev"in mətbuat katibi Karolin Levitt bunun Trampın planlarına təsir etməyəcəyini bəyan edib.