Gəmilərin fəaliyyətini bərpa edəcəyi vaxt açıqlanıb

Xəzər dənizində üzən gəmilərin fəaliyyətinin aprelin 17-si gündüz saatlarından etibarən bərpa ediləcəyi gözlənilir.

Bu barədə “PostMedia” “Azərbaycan Xəzər Dəniz Gəmiçiliyi” QSC-dən (ASCO) məlumat verilib.

Bildirilib ki, təhlükəsizlik məqsədilə hazırda ASCO-ya məxsus gəmilər güclü küləkli hava şəraiti ilə əlaqədar lövbər dayanacaqlarında və sığınacaqlarda yerləşdirilib.

Qeyd edək ki, aprelin 16-sı saat 10:00-a olan məlumata əsasən, ölkə ərazisində qeyri-sabit və küləkli hava şəraiti hökm sürür. Gecədən etibarən başlayan güclü yağış və şimşək hadisələri hələ də davam edir.

Hazırda şimal-qərb istiqamətində əsən güclü külək Bakıda və Abşeron yarımadasında 34 m/s, Altıağacda 19 m/s, Şamaxı və Naftalanda 18 m/s, Qubada isə 16 m/s sürətə çatıb. Neft Daşları stansiyasından verilən məlumata görə, Xəzər dənizində dalğaların hündürlüyü 3 metrə qədər yüksəlib.