Ermənistan Rusiya ilə birlikdə Gümrü–Qars dəmir yolu hissəsinin tikintisini başa çatdırmağa hazırdır – XİN

"Çatışmayan Gümrü–Qars dəmir yolu hissəsinin tikintisi həyata keçirilməlidir".

"PostMedia" xəbər verir ki, bunu jurnalistlərlə söhbətində məzuniyyətdə olan Ermənistanın xarici işlər naziri Ararat Mirzoyan bəyan edib.

O bildirib ki, hazırda rusiyalı tərəfdaşlarla bu məsələ üzrə danışıqlar aparılır.

“Əgər bu hissəni birgə şəkildə başa çatdırmaq mümkün olsa, biz həmin yolla irəliləyəcəyik. Əgər mümkün olmasa, başqa həll yolu tapacağıq. Amma bu məsələ həll edilməlidir”, – deyə Mirzoyan qeyd edib.

Onun sözlərinə görə, Ermənistanın Qərb–Şərq istiqamətində formalaşan yeni yük axınında alternativ həlqəyə çevrilmək üçün tarixi imkanı var.

“Bu hərəkət bu və ya digər şəkildə baş verəcək. Bizim əsas nəqliyyat qovşaqlarından birinə çevrilmək üçün tarixi imkanımız var. Bu imkanı əldən verməyəcəyik, onu əldən vermək olmaz. Buna görə də bu məsələ həll olunmalıdır”, – deyə o əlavə edib.