Çin Rusiyadan elektrik enerjisi alışını dayandırıb — "Kommersant"

Çin Rusiyadan elektrik enerjisi alışını dayandırıb.

"PostMedia" "Kommersant"a istinadən xəbər verir ki, yanvarın 1-dən etibarən Çinin Rusiyadan elektrik enerjisi idxalını dayandırmasının əsas səbəbi, ixrac qiymətlərinin daxili qiymətləri üstələyərək yüksək olmasıdır.

Qeyd olunur ki, yüksək qiymətlər Rusiyadan elektrik enerjisinin sonrakı alışını Pekin üçün səmərəsiz edib.

İxrac prosesinə "İnter RAO" şirkəti cavabdehdir. Şirkət Rusiyanın Uzaq Şərq regionunda yaranan və əsasən "RusHydro" hidroelektrik stansiyaları tərəfindən istehsal olunan elektrik enerjisi artıqlığını Çinə tədarük edirdi. Çin ilə müqavilə 2012-ci ildə imzalanıb və 2037-ci ilə qədər qüvvədədir. Gözlənilirdi ki, Rusiya bütün dövr ərzində Çinə təxminən 100 milyard kVt/saat, yəni illik təxminən 4 milyard kVt/saat elektrik enerjisi tədarük edəcək.

Müqavilədə elektrik enerjisinin qiymət düsturu açıqlanmır. Çində elektrik enerjisinin qiymətləri praktiki olaraq dəyişməz qalır və hazırda bir MVt/saat üçün təxminən 350 yuan (təxminən 85,4 manat) təşkil edir. Lakin bazarın liberallaşdırılması səbəbindən, Uzaq Şərq Federal Dairəsində elektrik enerjisinin vahid qiyməti yanvarın sonunda bir MVt/saat üçün təxminən 94 manata çata bilər ki, bu da ötən ilin yanvar ayı ilə müqayisədə 42% çoxdur.

Energetika Nazirliyi bildirib ki, tədarüklər Çindən sorğu alındıqdan və hər iki ölkə üçün faydalı əməkdaşlıq şərtləri əldə edildikdən sonra bərpa oluna bilər. "İnter RAO" isə Çin ilə ixrac müqaviləsinin qüvvədə qaldığını və onu ləğv etmək planlarının olmadığını bəyan edib.