Arda Güler “ayının ən yaxşı futbolçusu” seçilib

İspaniyanın “Real Madrid” klubunda çıxış edən Türkiyə millisinin üzvü Arda Güler oktyabr ayının ən yaxşı futbolçusu seçilib.

"PostMedia" xəbər verir ki, bu barədə məlumatı Madrid klubu rəsmi saytında yayıb.

Gənc yarımmüdafiəçi son həftələrdə nümayiş etdirdiyi yüksək performansla həm azarkeşlərin, həm də klub rəhbərliyinin rəğbətini qazanıb. “Real Madrid” azarkeşləri arasında keçirilən səsvermənin nəticələrinə əsasən, Arda Güler ayın oyunçusu adına layiq görülüb.

Bu mövsüm La Liqada 10 oyuna çıxan 20 yaşlı futbolçu 3 qol vurub və 4 qolun ötürməsini verib. Onun çıxışı xüsusilə komandanın son oyunlarında həlledici olub.

Mətbuat Ardanın bu nailiyyətini “gənc istedadın Madrid ulduzları arasında parlaması” kimi dəyərləndirib. Klub rəhbərliyi isə onun gələcəkdə “Real Madrid”in əsas oyunçularından birinə çevriləcəyinə inandıqlarını bildirib.