NBA basketbolçusu hava limanında marixuana ilə saxlanılıb

“Dallas Mavericks”in oyunçusu Brendon Uilyams beynəlxalq Dallas hava limanında 36 qram marixuana keçirməyə cəhd göstərdiyi üçün saxlanılıb. Bu barədə DLLS Sports məlumat yayıb.

“PostMedia” xəbər verir ki, idmançı hüquq-mühafizə orqanlarına çamadanın ona məxsus olduğunu təsdiqləsə də, bağlamanı menecerinin hazırladığını bildirib.

Uilyams son iki oyunda “şəxsi səbəblər”ə görə iştirak etməyib. Onun yaxınlaşan “İndiana” ilə oyunda meydana çıxıb-çıxmayacağı hələ məlum deyil. “Mavericks” rəhbərliyi hadisə ilə bağlı şərh verməkdən imtina edib.

NBA-da yeni kollektiv müqaviləyə əsasən marixuana artıq dopinq test proqramından çıxarılsa da, onun saxlanılması və daşınması ABŞ federal qanunvericiliyinə görə hələ də qanun pozuntusu sayılır.

25 yaşlı Uilyams karyerasına G-Liqada başlayıb və 2024-cü ilin aprelində “Dallas”la çoxillik müqavilə imzalayıb. Mövsüm ərzində zədəyə görə o, cəmi iki oyunda ümumilikdə 18 dəqiqə oynayıb.

NBA-nın 2025/26 mövsümünün müntəzəm çempionatı 12 aprel tarixində başa çatacaq, pley-off mərhələsi isə 18 apreldə start götürəcək.

Bundan əvvəl “Spartak”ın hücumçusu kokain qəbul etdiyini etiraf etmişdi.