Gürcüstanda Ermənistanla sərhəddi qanunsuz keçən 4 xarici ölkə vətəndaşı saxlanılıb

Gürcüstanda Ermənistanla dövlət sərhədini qanunsuz şəkildə keçən 4 xarici ölkə vətəndaşı saxlanılıb.

"PostMedia" xəbər verir ki, bu barədə "Kvir" portalı məlumat yayıb.

Gürcüstan Daxili İşlər Nazirliyinin Sərhəd Polisi Tsiteli Xidi ərazisində, “Sadaxlo” sərhəd sahəsində Gürcüstanın dövlət sərhədini qrup halında qanunsuz keçməyə cəhd göstərdiklərinə görə dörd xarici vətəndaşı – M.İ. (1995-ci il təvəllüdlü), C.A. (2001-ci il təvəllüdlü), A.M. (1998-ci il təvəllüdlü) və Z.R. (1998-ci il təvəllüdlü) saxlayıb.

Sərhəd Polisinin məlumatına görə, istintaq zamanı müəyyən edilib ki, təqsirləndirilən şəxslər sərhəd-keçid məntəqəsini yan keçərək qrup halında Gürcüstanın dövlət sərhədini qanunsuz şəkildə keçib və Ermənistan Respublikasından Gürcüstan ərazisinə daxil olublar.

“Məsələ ilə bağlı Gürcüstan Cinayət Məcəlləsinin 344-cü maddəsinin ikinci hissəsinin "a" bəndi üzrə istintaq aparılır. Həmin maddə 5 ilədək azadlıqdan məhrumetmə cəzası nəzərdə tutur”, – deyə məlumatda qeyd olunur.