Qırğızıstanın keçmiş xarici işlər naziri vəzifəsindən sui-istifadə etməkdə ittiham olunur

Qırğızıstan Daxili İşlər Nazirliyi keçmiş xarici işlər naziri Çingiz Aydarbekov barəsində vəzifə səlahiyyətlərindən sui-istifadə ilə bağlı ittiham irəli sürüb.

"PostMedia" xəbər verir ki, bu barədə "Kommersant" məlumat yayıb.

Məlumata görə, Aydarbekovun ölkəyə girişinə də qadağa qoyulub. O, 2018–2020-ci illərdə Qırğızıstanın xarici işlər naziri vəzifəsində çalışıb.

Nazirliyin açıqlamasında bildirilir ki, onun işlədiyi dövrdə bəzi əməkdaşlarla birlikdə dövlət büdcə vəsaitlərinin istifadəsində qanun pozuntularına yol verilib və bu hallar üzrə cinayət işi açılıb. İttihamlar arasında şişirdilmiş xərclər, müvafiq sənədlər olmadan əmlak və vəsaitlərin silinməsi, saxta sənədlərdən istifadə və mənimsəmə halları kimi epizodlar yer alır. Hazırda istintaq iş üzrə araşdırmaları davam etdirir.