Ölümcül sevgi: Məşuqəsi “El Menço”nu ölümə apardı

Meksika hakimiyyətinin məlumatına görə, “El Menço” ləqəbi ilə tanınan narkokartel lideri Nemesio Oseqeranın məşuqəsi ilə görüşü onun yerinin müəyyən edilməsinə, saxlanılmasına və nəticədə ölümünə səbəb olub. Bundan sonra hökumətin əməliyyatlarına cavab olaraq Milli Qvardiyanın 25 hərbçisi öldürülüb.

"PostMedia" xəbər verir ki, bu barədə "Reuters" məlumat yayıb.

Meksikanın ən çox axtarılan kartel başçısı olan Oseqera güclü “Xalisko Yeni Nəsil” (CJNG) kartelinin qurucusu idi. ABŞ onun tutulmasına kömək edəcək məlumat üçün 15 milyon dollar mükafat vəd etmişdi.

Meksikanın Müdafiə Nazirliyinin məlumatına görə, o, Xalisko ştatının qərbində yerləşən Tapalpa şəhəri yaxınlığındakı meşəlik ərazidə keçirilən xüsusi əməliyyat zamanı xüsusi təyinatlı qüvvələrin açdığı atəş nəticəsində yaralanıb və vertolyotda həyatını itirib.

Müdafiə naziri Rikardo Trevilya bildirib ki, Oseqeranın məşuqələrindən birinin etibarlı şəxsindən əldə edilən məlumat hakimiyyətə onun malikanəsinə ertəsi gün hücumu sürətlə planlaşdırmağa imkan verib.

Əməliyyat zamanı Oseqeranın silahlıları təhlükəsizlik qüvvələrinə atəş açıb, qarşıdurma isə meşəlik ərazidə yerləşən daxmalar kompleksinə keçib. Burada Oseqera iki mühafizəçisi ilə birlikdə yaralanıb. Üçü də vertolyotla Mexikoya aparılsa da, sağ qalmayıblar.

Oseqeranın ölümü ölkə boyu zorakılıq dalğasına səbəb olub. Kartel tərəfdarları hökumətin addımlarına cavab olaraq yolları bağlayıb, avtomobilləri yandırıblar.

Təhlükəsizlik naziri Omar Qarsiya Harfux jurnalistlərə bildirib ki, hücumlar nəticəsində kartelin 30 üzvü və bir təsadüfi mülki şəxs həlak olub, yeddi ştatda isə ən azı 70 nəfər saxlanılıb.

Müdafiə Nazirliyinin məlumatına görə, Xaliskoda hücumları Oseqeranın sağ əli və baş maliyyə direktoru, “El Tuli” ləqəbi ilə tanınan şəxs təşkil edib. O da saxlanılarkən təhlükəsizlik qüvvələri ilə qarşıdurma zamanı öldürülüb.

Nazir Qarsiya əlavə edib ki, hakimiyyət kartelin mümkün cavab addımlarını və yenidən təşkilatlanma cəhdlərini diqqətlə izləyir, çünki bu, yeni zorakılıq dalğasına səbəb ola bilər.

Rəsmi şəxslərin sözlərinə görə, ABŞ kəşfiyyatı Tapalpadakı malikanənin dəqiq yerinin müəyyən edilməsində kömək göstərib, lakin əməliyyatın tam şəkildə Meksika tərəfindən idarə edildiyi vurğulanır.

“Bu əməliyyatda ABŞ qüvvələri iştirak etməyib. Sadəcə məlumat mübadiləsi aparılıb,” – deyə ölkə prezidenti Klaudiya Şeynbaum bildirib.