Türkiyə hüquq-mühafizə orqanları bazar ertəsi günü Fətullah Gülənin təşkilatı (FETÖ – Türkiyədə terror təşkilatı kimi tanınır) ilə əlaqədə şübhəli bilinən 80-dən çox şəxsi saxlayıb.
"PostMedia" xəbər verir ki, bu barədə Türkiyənin daxili işlər naziri Ali Yerlikaya X sosial şəbəkəsində məlumat verib.
Nazirin sözlərinə görə, reydlər bir neçə şəhərdə keçirilib.
“Bu gün səhər saatlarında İstanbul, Ankara, İzmir, Diyarbəkir və Balıkesirdə FETÖ-yə qarşı keçirdiyimiz əməliyyatlar çərçivəsində, aralarında hazırda vəzifədə olan dövlət qulluqçularının da olduğu 81 şübhəli saxlanılıb”, – deyə Yerlikaya bildirib.
Türkiyə hakimiyyəti Gülən təşkilatını — FETÖ-nü — 2016-cı il 15 iyulda, 9 il əvvəl baş vermiş dövlət çevrilişi cəhdinin təşkilində ittiham edir.
Həmin çevriliş cəhdindən sonra Türkiyədə 80 mindən çox insan həbs edilib, o cümlədən hərbçilər də daxil olmaqla təxminən 150 min dövlət qulluqçusu işdən çıxarılıb və ya vəzifədən kənarlaşdırılıb. ABŞ-da yaşayan (hazırda vəfat etmiş) Fətullah Gülən isə çevriliş cəhdini pisləyib və ona qarşı irəli sürülən ittihamları rədd edib.
