Üzüm orqanizmi ölümün əsas səbəbindən qoruyur – "The Mirror"

Yeni tədqiqatın nəticələrinə görə, cəmi bir şirin meyvənin müntəzəm qəbulu infarkt və ya insultun qarşısını ala bilər. "PostMedia" xəbər verir ki, bu barədə "The Mirror" nəşri yazıb.

Məlumata görə, söhbət bioloji aktiv maddələrlə zəngin olan üzümdən gedir. Bu maddələr bağırsaq mikrobiotasının vəziyyətini yaxşılaşdırır və xolesterinin səviyyəsini azaldır.

Araşdırma göstərib ki, cəmi dörd həftə ərzində üzümün müntəzəm istifadəsi, xüsusilə rasionunda az tərəvəz olan insanlarda nəzərəçarpacaq nəticələr verib. Qidalanmada edilən bu sadə dəyişiklik dünyada ölümün aparıcı səbəbi sayılan ürək-damar xəstəlikləri riskini azalda bilər.

Üzüm güclü antioksidantlar ehtiva edir və onlar orqanizmdə iltihabi prosesləri zəiflədir. Tədqiqatın rəhbəri, Los-Ancelesdəki Kaliforniya Universitetinin professoru Çjaopin Lin bildirib:

“Üzüm bağırsaq mikroorqanizmlərinin müxtəlifliyini artırır və xolesterinin səviyyəsini aşağı salır.”

Alimlər 21–55 yaş arası iştirakçıları izləyiblər. Onlar hər gün təxminən 40 üzüm giləsinə və ya iki porsiyaya bərabər miqdarda üzüm qəbul ediblər. Eyni zamanda həm tədqiqatdan əvvəl, həm də tədqiqat dövründə lif və bitki mənşəli birləşmələr (polifenollar) baxımından kasıb pəhriz saxlanılıb. Cəmi bir ay sonra iştirakçıların bağırsaq mikrobiomunun – sağlamlıq üçün həyati əhəmiyyət daşıyan trilyonlarla mikroorqanizmin – müxtəlifliyi əhəmiyyətli dərəcədə artıb.

“Pis” xolesterinin səviyyəsi təxminən 8 faiz azalıb, onun yığılmasına səbəb olan öd turşuları isə 40 faizdən çox azalıb. Bu zərərli yağlar damarları tıxayan trombların yaranmasına və ürək və ya beynin qanla təchizatının pozulmasına səbəb ola bilər.

Artan faydalı bakteriyalar arasında Akkermansia da olub – bu mikroorqanizm şəkəri və xolesterini parçalamağa, həmçinin bağırsağın selikli qişasını möhkəmləndirməyə kömək edir.

“Biz müəyyən etdik ki, üzüm bağırsaq mikrobiotasına müsbət təsir göstərir və sağlam bağırsaqlar orqanizmin ümumi vəziyyəti üçün olduqca vacibdir,” – deyə professor Lin vurğulayıb.

Onun sözlərinə görə, bu araşdırma üzümün faydaları barədə təsəvvürləri genişləndirir və onun ürək sağlamlığına, o cümlədən xolesterini azaltmaq qabiliyyətinə müsbət təsirini təsdiqləyir. Daha əvvəl aparılan tədqiqatlarda üzüm yaşla bağlı çəki artımının azalması və libidonun yaxşılaşması ilə də əlaqələndirilib.

“Üzüm polifenollar və lif baxımından zəngin mənbədir. Ümumilikdə nəticələrimiz üzümün bağırsaq mikrobiomu, xolesterin səviyyəsi və öd turşularının mübadiləsinə təsiri ilə bağlı yeni ilkin məlumatlar təqdim edir,” – deyə professor Lin əlavə edib.