Kadırov üç gün ərzində üçüncü dəfə sağlam olduğunu bəyan edib

Çeçenistanın rəhbəri Ramzan Kadırov üç gün ərzində üçüncü dəfə açıq şəkildə sağlam olduğunu bildirib.

"PostMedia" xəbər verir ki, o, sonuncu bəyanatını yanvarın 14-ü axşam saatlarında Benoy dağ kəndindən canlı yayım zamanı səsləndirib. "Uca Allaha and içirəm ki, nə böyrəklərimdə, nə qaraciyərimdə, nə dalağımda, nə də mədəmdə heç bir ağrı yoxdur. Dözə bilmədiyim yeganə şey qara istiotdur, qalan hər şey qaydasındadır. Kifayət qədər gücüm var", - deyə o, çeçen dilində bəyan edib (onun sözlərinin tərcüməsini "ÇP Qroznı" səhifəsi təqdim edib).

Bir qədər əvvəl Çeçenistan Dövlət Televiziya və Radio Şirkəti Kadırovun maşın sürərkən çəkilmiş videosunu yayımlayıb. Videoda o, "Xəstəxanada olmadığımı deməyi unutmuşdum", - deyir. Yanvarın 12-də Çeçenistan rəhbəri öz Telegram kanalında rəsmi şəxslərlə görüşünün videosunu yerləşdirib və orada da hər hansı sağlamlıq probleminin olduğunu təkzib edərək, internetdəki "saxta məlumatlara" qarşı daha güclü mübarizə aparmağa çağırıb. Kadırov böyrək çatışmazlığından əziyyət çəkdiyi və xəstəxanaya yerləşdirildiyi barədə xəbərlərə qəzəbini ifadə edib. "Məni televiziyada və sosial şəbəkələrdə gördükləri halda, hələ də xəstə olduğumu və öldüyümü iddia etməyə davam edirlər", - deyə o şikayətlənib.

Dekabrın sonunda Kadırova yaxın bir mənbə "Novaya Qazeta. Avropa" nəşrinə bildirib ki, o, dekabrın 24-dən 25-nə keçən gecə Moskvada təcili xəstəxanaya yerləşdirilib. Mənbənin sözlərinə görə, Kadırov paytaxta Vladimir Putinin sədrliyi ilə keçirilən Dövlət Şurasının iclasında iştirak etmək üçün gəlib, lakin vəziyyəti qəfil pisləşib. Bundan sonra o, təcili yardım maşını ilə Rusiya Federasiyası Prezidentinin İşlər İdarəsinin Mərkəzi Klinik Xəstəxanasına aparılıb. Mənbə iddia edir ki, Kadırov "çətinliklə özünə gəlib".

Yanvarın 11-də isə "İnterfaks-Ukrayna" agentliyi Ukrayna Müdafiə Nazirliyinin Baş Kəşfiyyat İdarəsindəki mənbələrə istinadən Kadırovun səhhətinin pisləşdiyini və böyrək çatışmazlığı səbəbindən dializ müalicəsi aldığını xəbər verib.