Alimlər: Yer kürəsinin əhalisi planetin daşıma qabiliyyətini aşıb

Avstraliyalı alimlər müəyyən ediblər ki, Yer kürəsinin əhalisinin sayı və bununla bağlı resurs istehlakı artıq planetin imkanlarını üstələyib.

"PostMedia" xəbə verir ki, bu barədə "ScienceAlert" portalı araşdırmaya istinadən məlumat yayıb.

Məlumata görə, Flinders Universitetində Corey Bredşou rəhbərliyi ilə çalışan alimlər qrupu iki əsrdən artıq dövrü əhatə edən demoqrafik məlumatları analiz edib. Nəticədə müəyyən olunub ki, bəşəriyyət artıq planetin uzunmüddətli perspektivdə dəstəkləyə biləcəyi sərhədlərdən kənarda yaşayır.

Alimlərin qeydinə görə, hazırda Yer kürəsinin əhalisi təxminən 8,3 milyard nəfərdir. Halbuki tədqiqatçıların fikrincə, planet üçün optimal əhali sayı təxminən 2,5 milyard nəfərdir.

“Yer bizim resurslardan istifadə tempimizə çata bilmir. Böyük dəyişikliklər olmadan o, hətta indiki tələbatı da qarşılaya bilməz. Araşdırmalarımız göstərir ki, biz planetə onun tab gətirə biləcəyindən daha böyük təzyiq göstəririk”, – deyə Bredşou bildirib.