İnsanların həyatını kökündən dəyişə biləcək qədim bakteriyalar aşkar edilib

Rumıniya Elmlər Akademiyasının Buxarest Biologiya İnstitutunun (IBB) alimləri Rumıniyanın Skərişoara buz mağarasındakı 5000 illik buz qatından əldə edilmiş bakteriyaları tədqiq ediblər. Alimlərin fikrincə, bu qədim bakteriyalar gələcəkdə “superbakteriyalarla” mübarizədə mühüm rol oynaya bilər, lakin bu, yalnız onların özlərinin superbakteriyaya çevrilməməsi halında mümkün olacaq.

"PostMedia" xəbər verir ki, bu barədə "Science Alert" nəşri yazıb.

Məlumdur ki, bakteriyalar elmin təqdim etdiyi ən təsirli müalicə üsullarına uyğunlaşmaq üçün daim təkamül keçirir. Nəticədə, antibiotiklərə qarşı davamlılıq ictimai səhiyyə üçün ciddi problemə çevrilib, deyə "Focus" nəşrində gedən yazıda bildirilib.

Buz mağaraları kimi ekstremal şəraitlər mikroorqanizmlərin müxtəlifliyinin artmasına şərait yaradır. Tədqiqatın müəllifləri hesab edirlər ki, bu genetik adaptasiya ya daha güclü antibiotiklərin hazırlanmasına yol aça, ya da vəziyyəti daha da ağırlaşdıra bilər.

Araşdırmanın həmmüəllifi, mikrobioloq Kristina Purkareya bildirir ki, Skərişoara buz mağarasından ayrılmış "Psychrobacter SC65A.3" bakteriya ştammı, qədim mənşəyinə baxmayaraq, bir çox müasir antibiotiklərə qarşı davamlıdır və davamlılıqla bağlı 100-dən çox genə malikdir. Digər tərəfdən, bu ştamm bir sıra əsas “superbakteriyaların” böyüməsini də boğa bilir və mühüm fermentativ aktivlik nümayiş etdirir, bu da ona böyük biotexnoloji potensial qazandırır.

Tədqiqat zamanı alimlər mağaradan 25 metrlik buz nüvəsi çıxarıblar. Daha sonra genom sekvenasiyası aparılıb və soyuq şəraitdə yaşamağa və antimikrob aktivliyə cavabdeh genlər müəyyən edilib. Analiz göstərib ki, "Psychrobacter SC65A.3" həm xeyir, həm də təhlükə mənbəyi ola bilər. Sadə desək, bu yeni ştamm yeni antibiotiklərin mənbəyinə çevrilə, eyni zamanda dərmanlara davamlılıq genlərini digər bakteriyalarla paylaşaraq riski artıra bilər.

Araşdırma göstərir ki, bu bakteriya ştammı ağciyər, dəri, qan və digər geniş yayılmış infeksiyaların müalicəsində istifadə olunan antibiotiklərə qarşı davamlıdır.

Bu bakteriya soyuğa yüksək davamlılığı ilə seçilən Psychrobacter cinsinə aiddir. Lakin tədqiqatçılar qeyd edirlər ki, bu mikroorqanizmlərin təkamülü və onların müasir antibiotiklərin təkmilləşdirilməsində necə istifadə oluna biləcəyi ilə bağlı hələ çoxlu suallar mövcuddur.