Ararat Mirzoyan Aİ nümayəndəsi ilə Azərbaycanla olan münasibətləri müzakirə edib

Ermənistan xarici işlər naziri Ararat Mirzoyan Cənubi Qafqaz və Gürcüstandakı böhran məsələləri üzrə Aİ-nin xüsusi nümayəndəsi Maqdalena Qrono ilə görüşüb.

"PostMedia" xəbər verir ki, bu barədə Ermənistan Xarici İşlər Nazirliyi məlumat yayıb.

Ararat Mirzoyan və Maqdalena Qrono regional məsələlər ətrafında fikir mübadiləsi aparıblar. Nəqliyyat və iqtisadi əlaqəlilik şəbəkəsinin genişləndirilməsi kontekstində Aİ-nin “Qlobal darvaza” və Ermənistanın “Sülh kəsişməsi” proqramlarının uzlaşdığı vurğulanıb və onların həyata keçirilməsi istiqamətində atılan addımlar müzakirə edilib.

Görüşdə həmçinin 8 avqust razılaşmaları nəticəsində Ermənistan və Azərbaycan arasında formalaşmış sülh imkanlarının ən yaxşı şəkildə reallaşdırılması və sülhün daha da möhkəmləndirilməsi üçün görülən səylər barədə fikir mübadiləsi aparılıb.