Gürcüstan Azərbaycan-Ermənistan sülh sazişinin tezliklə imzalanmasına ümid edir

Gürcüstan Azərbaycanın və Ermənistanın davam edən dialoqunu diqqətlə izləyir və yaxın gələcəkdə sülh sazişinin imzalanacağına ümid edir.

"PostMedia" xəbər verir ki, bu barədə Gürcüstanın xarici işlər naziri Maka Boçorişvili azərbaycanlı həmkarı ilə birgə brifinq zamanı bildirib.

Nazirin sözlərinə görə, Tbilisi regionda uzunmüddətli sülh və sabitliyin möhkəmlənməsində səmimi şəkildə maraqlıdır:

“Biz hər zaman demişik və bir daha qeyd edirik: Gürcüstan regionda sülh və sabitliyin güclənməsində səmimi şəkildə maraqlıdır. 17 aprel tarixində üçtərəfli görüş keçirmək imkanından məmnun qaldıq. Bu, belə formatda ilk görüş idi — hər üç ölkənin xarici işlər nazirinin müavinləri Tbilisidə toplaşaraq regional əhəmiyyət daşıyan məsələləri müzakirə etdilər. Düşünürük ki, bu formatda əməkdaşlığın davam etdirilməsi üçün potensial var”.

Boçorişvili bildirib ki, regionda baş verən proseslər və bu kontekstdə ölkələr arasında əməkdaşlıq xüsusi əhəmiyyət daşıyır.