Pentaqon rəhbəri ABŞ Konqresində İranla müharibə ilə bağlı ifadə verib

ABŞ Konqresində İrana qarşı müharibə məsələsi ilə bağlı dinləmələr keçirilir.

"PostMedia" AP-yə istinadən xəbər verir ki, iclasda Pit Heqset də iştirak edir.

ABŞ müdafiə naziri giriş çıxışında “düşüncəsiz skeptikləri” sərt tənqid edib.

“Dünən dediyimi bu gün də təkrar edirəm: hazırda qarşılaşdığımız ən böyük rəqib Konqresdəki demokratların və bəzi respublikaçıların məsuliyyətsiz şübhələri və məğlubiyyətçi bəyanatlarıdır”, – deyə Heqset Senat komitəsinə müraciətində bildirib.

Donald Trampın büdcə sorğusunu müdafiə edən Pentaqon rəhbəri qeyd edib ki, prezident “ABŞ-nin əvvəlki illərdə apardığı siyasət nəticəsində zəiflədilmiş hərbi-sənaye bazasını miras alıb”.

Onun sözlərinə görə, bu siyasət ABŞ-nin güc nümayiş etdirmək imkanlarının azalmasına gətirib çıxarıb.

Öz növbəsində, general Den Keyn bildirib ki, Birləşmiş Qərargah Rəisləri Komitəsinin sədri kimi əsas vəzifəsi ölkənin mülki rəhbərliyini hərbi imkanlar və onlarla bağlı risklər barədə tam məlumatlandırmaqdır.