Tramp Qəzza zolağının müharibədən sonrakı idarəetməsi üçün Sülh Şurasının yaradıldığını elan edib

ABŞ Prezidenti Donald Tramp, Qəzza zolağının müharibədən sonrakı idarəetməsinə nəzarət edəcək "Sülh Şurası"nın yaradıldığını bəyan edib.

"PostMedia" xəbər verir ki, o, bu barədə "Truth Social" sosial media platformasında paylaşım edib.

"Stiv Uitkoffun elan etdiyi kimi, biz rəsmən Qəzza zolağı üçün 20 bəndlik sülh planının növbəti mərhələsinə keçdik", — deyə o yazıb.

ABŞ prezidentinin sözlərinə görə, Sülh Şurası yeni təyin olunmuş Fələstin texnokratik hökuməti — Qəzza Milli İdarəetmə Komitəsi ilə sıx əməkdaşlıq edəcək. Bu qurum keçid dövründə Qəzza zolağını idarə edəcək.

Tramp həmçinin bildirib ki, atəşkəs elan edildiyi gündən bəri onun administrasiyası Qəzza zolağına rekord səviyyədə humanitar yardım göstərib. O hesab edir ki, bu, sülh prosesinin növbəti mərhələsinə keçmək üçün zəruri şərait yaradıb.

ABŞ prezidenti Həmasın tamamilə tərksilah edilməsinin vacibliyini də vurğulayıb. Onun sözlərinə görə, Misir, Türkiyə və Qətərin dəstəyi ilə bütün silahların təhvil verilməsini və qruplaşmanın tunel infrastrukturunun sökülməsini nəzərdə tutan hərtərəfli saziş planlaşdırılır.

Tramp Həması öhdəliklərini, o cümlədən həlak olanların son qalıqlarının İsrailə qaytarılmasını dərhal yerinə yetirməyə çağırıb.

"Qəzza xalqı kifayət qədər uzun müddət əziyyət çəkib. Artıq vaxtı gəlib", — deyə o yekunlaşdırıb.

Yanvarın 14-də Birləşmiş Ştatlar prezident Donald Trampın Qəzza zolağında müharibəni dayandırmaq üçün 20 bəndlik planının ikinci mərhələsinin başladığını elan etdi. Bu plan demilitarizasiya, texnokratik idarəetmə və yenidənqurmaya keçidi nəzərdə tutur. ABŞ prezidentinin xüsusi elçisi Stiv Uitkoff bu barədə "X" sosial şəbəkəsində məlumat paylaşıb.