ABŞ və Ermənistan TRIPP-lə bağlı birgə sənəd hazırlayır

Ermənistan hökuməti ABŞ ilə birgə “Tramp marşrutu” layihəsinə dair sənəd və ya memorandum hazırlayır.

"PostMedia" xəbər verir ki, bu barədə dekabrın 25-də hökumət iclasından sonra brifinqdə Ermənistanın Baş naziri Nikol Paşinyan məlumat verib.

Paşinyan bildirib ki, sənəd iki tərəf tərəfindən müəyyən formatda qəbul edilməlidir və bundan sonra layihənin növbəti mərhələsi başlanacaq. Hazırda hökumət “Tramp marşrutu” layihəsinin çərçivələrini işləyir, bu da Vaşinqton razılaşmasında nəzərdə tutulub.

Baş nazirin proqnozuna görə, layihə üzrə işləri praktik olaraq 2026-cı ilin ikinci yarısında görmək mümkün olacaq. O, qeyd edib ki, dəmiryolu layihəsi ilk reallaşacaq, lakin iqtisadi məqsədəuyğunluq və investisiya cəlbedicliyi nəzərə alınaraq, qaz və ya neft boru kəməri layihəsi planlaşdırılandan əvvəl başlaya bilər.

Hökumət hazırda sərhəd və gömrük infrastrukturu üçün müasir, hətta super-müasir texnika əldə etmək üzərində işləyir. Bu infrastruktur yalnız Ermənistan-Azərbaycan sərhədində deyil, həm də Ermənistan-Gürcüstan, Ermənistan-Türkiyə və Ermənistan-İran sərhədlərində qurulacaq.

Xatırladaq ki, 8 avqustda Vaşinqtonda Ermənistan, ABŞ və Azərbaycan liderləri münaqişənin sülh yolu ilə həllinə dair birgə deklarasiya imzalayıblar.

ABŞ prezidentinin açıqlamasına görə, “Tramp marşrutu” çərçivəsində Ermənistan Ştatlara eksklüziv uzunmüddətli hüquqlar verəcək — 99 il müddətinə yolu inkişaf etdirmək hüququ, bu isə Ermənistan qanunvericiliyi əsasında həyata keçiriləcək. Layihə üzrə ABŞ tərəfindən torpaq subarenda konsorsiumuna veriləcək ki, o, infrastruktur və idarəçiliyə cavabdeh olacaq. Həmçinin iki ölkənin xarici işlər nazirləri sülh sazişini paraflayıblar.