Aİ dondurulmuş Rusiya aktivləri hesabına Ukraynanın maliyyələşdirilməsi variantını araşdırmağa razılaşıb

Aİ Ukraynanı birgə kredit yolu ilə deyil, məhz dondurulmuş Rusiya aktivləri vasitəsilə maliyyələşdirmək variantı üzərində işləməyə razılıq verib.

"PostMedia" xəbər verir ki, bu barədə Polşanın Baş naziri Donald Tusk bəyanat verib.

"Biz, şübhəsiz ki, irəliləyişə yaxınıq. İrəliləyiş o deməkdir ki, hər kəs bunu sınamağın vacibliyi ilə razıdır və Rusiya aktivlərindən istifadənin Ukrayna üçün ədalətli, Avropa üçün isə faydalı olacağını qəbul edir. Lakin bəzi ölkələr öz zəmanətlərini artırmaq üçün sona qədər mübarizə aparacaqlar", — deyə Tusk bildirib.

Tusk aydınlıq gətirib ki, Avropanın birgə vəsait götürərək Ukraynaya təqdim etdiyi ikinci variant "Aİ-nin əsas ölkələri arasında böyük həvəs yaratmır".

"Biz Rusiya aktivlərinə əsaslanan kompensasiya kreditini müzakirə etməyə və Belçika kimi ən həssas ölkələrə ciddi zəmanətlər verməyə üstünlük veririk ki, onlar bu təminatların real olduğunu hiss etsinlər", — deyə Polşanın Baş naziri izah edib.

O, etiraf edib ki, qarşıda hələ "daha texniki müzakirələr üçün" çoxlu saatlar var.

Aİ liderlərinin dondurulmuş Rusiya aktivlərinin taleyini müəyyənləşdirməsi ilə bağlı daha ətraflı məlumat üçün saytımızdakı məqaləni oxuya bilərsiniz.