İlon Mask "SpaceX"da mövqeyini daha da gücləndirib

"SpaceX" ilkin kütləvi təklifdən (IPO) sonra şirkətin baş direktoru və direktorlar şurasının sədri vəzifələrində İlon Maskın nəzarətini daha da gücləndirib.

"PostMedia" xəbər verir ki, bu barədə "Reuters" şirkətin qeydiyyat sənədlərinə istinadən məlumat yayıb.

Sənədlərdə qeyd olunur ki, Mask öz razılığı olmadan baş direktor və direktorlar şurasının sədri vəzifələrindən uzaqlaşdırıla bilməz. O, yalnız B sinif supersəsvermə hüquqlu səhmlərin sahiblərinin səsverməsi ilə vəzifədən kənarlaşdırıla bilər. Həmin səhmlərin hər biri on səs hüququ verir və IPO-dan sonra da onların əsas hissəsinin Maskın nəzarətində qalacağı gözlənilir.

Bu isə faktiki olaraq o deməkdir ki, onun vəzifədən çıxarılması qərarı səsvermə strukturundan asılı olacaq və burada yekun təsir imkanları yenə də Maskın əlində qalacaq.

Sənədlərdə həmçinin bildirilir ki, B sinif səhmlərin böyük hissəsini uzunmüddətli perspektivdə əlində saxlayacağı təqdirdə, Mask direktorlar şurası üzvlərinin əksəriyyətinin seçilməsi və vəzifədən azad edilməsinə təsir göstərmək imkanını qoruyacaq.

Korporativ idarəetmə üzrə ekspertlər bildirirlər ki, belə model texnologiya sektorunda qəbul olunmuş standart praktikadan kənara çıxır.

"SpaceX" isə investorları xəbərdar edib ki, bu idarəetmə strukturu onların korporativ qərarlara və direktorlar şurasının formalaşmasına təsir imkanlarını məhdudlaşdıracaq.