Kütləvi informasiya vasitələrinin dili sosial şəbəkələr vasitəsilə insanların baxışlarını necə səssizcə dəyişir

Alimlər media dilinin və sosial şəbəkələrin miqrasiya mövzusunda baxışların yayılmasına necə təsir etdiyini təhlil ediblər.

"PostMedia"nın məlumatına görə, "Economic Inquiry" jurnalında dərc olunan araşdırma göstərib ki, mediada istifadə olunan dilin dəyişməsi insanların siyasi mövqelərini təkcə xəbərlərlə birbaşa tanışlıq yolu ilə deyil, həm də insanlar arasındakı sosial əlaqələr vasitəsilə dəyişə bilir.

Tədqiqat üçün alimlər 2013-cü ildə böyük xəbər agentliyi "Associated Press"in “qanunsuz miqrant” terminindən imtina etməsi ilə bağlı məlumatlardan istifadə ediblər. Bu dəyişiklik siyasi səbəblərlə deyil, daha neytral dilə yönəlmiş redaksiya siyasətinin bir hissəsi kimi həyata keçirilib.

Bir çox qəzet və media qurumu "Associated Press"in materiallarından asılı olduğuna görə, bu dil dəyişikliyi ABŞ-nin müxtəlif bölgələrinə yayılıb. Tədqiqatçılar müəyyən ediblər ki, "Facebook" vasitəsilə dil normlarını daha tez qəbul etmiş icmalarla sosial əlaqəsi olan insanların miqrasiya siyasətinə dair daha az sərt mövqelər ifadə etmə ehtimalı yüksəkdir.

Bu nəticələr əsasında müəlliflər belə qənaətə gəliblər ki, media dili siyasi münasibətləri xəbərlərin birbaşa istehlakından daha geniş miqyasda formalaşdıra bilir. Çünki insanlar baxışları yalnız mediadan deyil, həm də öz sosial şəbəkələrindən mənimsəyirlər. Bu dolayı təsir onu göstərir ki, sosial mediada aparılan müzakirələr və paylaşılan mövqelər, ilkin mənbəni oxumayan və ya izləməyən insanlar arasında belə, mühüm ictimai məsələlərin qavranılmasına təsir edir.

Araşdırma vurğulayır ki, media dili ilə sosial şəbəkələrin strukturu birlikdə cəmiyyətdə müəyyən siyasi ovqatları formalaşdırıb möhkəmləndirə, insanların əsas sosial və siyasi məsələlər — xüsusən də miqrasiya barədə — necə düşündüyünə təsir göstərə bilər.