Co Bayden və Kamala Harris Dik Çeyninin dəfn mərasimində iştirak ediblər

ABŞ-nin keçmiş prezidenti Co Bayden həyat yoldaşı və keçmiş vitse-prezident Kamala Harris ilə birlikdə ABŞ-nin sabiq vitse-prezidenti Dik Çeyninin dəfn mərasimində iştirak edib.

Bu barədə "PostMedia" "NBC News"a istinadən xəbər verir.

KİV-lər həmçinin Bayden ailəsi ilə Harris arasında salamlaşma anını qeyd ediblər.

Breitbart News-a verdiyi müsahibədə ABŞ-ın vitse-prezidenti Ceyms Devid Vens sabiq vitse-prezidentin ailəsinə başsağlığı verib. Bununla belə, nə özünün, nə də ABŞ Prezidenti Donald Trampın dəfn mərasiminə dəvət olunmadığı barədə məlumatları şərh etməyib.

“O, siyasi fikir ayrılıqlarına baxmayaraq, ölkəsinə xidmət etmiş bir şəxs idi. Biz, sözsüz ki, ailəsinə bu kədərli günlərdə səbir diləyirik”, – Vens bildirib.

Axios-un daha əvvəl yaydığı məlumata görə, nə Tramp, nə də Vens ABŞ-ın keçmiş vitse-prezidentinin dəfninə dəvət edilməyib.

Məlumata əsasən, ABŞ-ın fəaliyyət göstərən prezidentləri adətən ölkənin keçmiş dövlət və hökumət başçılarının, həmçinin vitse-prezidentlərinin dəfn mərasimlərində iştirak edirlər. Lakin hazırkı prezidentin dəvət olunmaması Çeyni ailəsi ilə münasibətlərdə gərginliklə bağlı ola bilər.

Qeyd edilir ki, bu, Trampın Respublikaçı Liz Çeyni — Dik Çeyninin qızı, 2017–2023-cü illərdə Vayominqdən Nümayəndələr Palatasının üzvü — barədə əvvəlki sərt açıqlamaları ilə əlaqəli ola bilər. Tramp onu 2024-cü il prezident seçkilərində Kamala Harrisə dəstək verdiyinə görə “radikal müharibə qartalı” adlandırmış və ona silah yönəldilsə, necə reaksiya verəcəyini sorğulamışdı.

84 yaşlı Dik Çeyni 4 noyabrda ürək-damar xəstəliyi və pnevmoniyadan sonra yaranan fəsadlar səbəbindən vəfat edib. O, 2012-ci ildə ürək transplantasiyası keçirib. Siyasətçinin iki qızı – Liz və Meri Çeyni, həmçinin yeddi nəvəsi var idi.