ABŞ-də təxminən 50 milyon sakin tornadoların yaxınlaşması barədə xəbərdarlıq alıb

ABŞ-nin düzənlik bölgələri və Orta Qərb ərazilərində yaşayan təxminən 50 milyon insan bazar günündən bazar ertəsinə qədər təhlükəli hava hadisələri, o cümlədən tornadolar səbəbilə yüksək hazırlıq vəziyyətindədir.

"PostMedia" xəbər verir ki, bu barədə "ABC News" məlumat yayıb.

Şiddətli hava şəraiti ilə bağlı yeni xəbərdarlıqlar həftəsonu Missisipi və Texas ştatlarının bəzi bölgələrində baş verən dağıdıcı fırtınalar və çoxsaylı burulğanlardan sonra verilib. "Texasın Wise County" dairəsinin rəsmilərinin bildirdiyinə görə, şənbə günü Runavey Bay şəhərində güclü fırtına nəticəsində bir nəfər həlak olub, bir neçə nəfər isə xəsarət alıb.

Ərazidən keçən güclü tufan beysbol topu ölçüsündə dolu və təhlükəli külək şiddətlənmələri ilə müşayiət olunub. Həmin tufan ən azı iki ehtimal olunan tornadonun yaranmasına səbəb olub. Fırtına Runaway Bay şəhərinin bir neçə məhəlləsində ciddi struktur zədələnmələr yaradıb və nəticədə azı 20 ailə evlərini tərk etməyə məcbur qalıb.

Şənbə axşamı düzənlik və cənub-qərb bölgələrində ən azı 12 təsdiqlənməmiş tornado qeydə alınıb. Bunlardan beşi Texasda, altısı Oklahoma ştatında, biri isə Nebraska ştatında baş verib.

Bazar günü Kanzas ştatının böyük hissəsində, həmçinin Missuri ştatının qərb və Nebraskanın cənub-şərq bölgələrində hava şəraitinin 5 ballıq şkala üzrə 3-cü səviyyədə — “yüksək risk”li olacağı proqnozlaşdırılır. Tornadolar, güclü külək və iri dolu ehtimal olunur.

Bazar ertəsi isə hava təhlükəsinin Missisipi çayı hövzəsinin aşağı hissəsindən Orta Qərbə doğru yayılacağı gözlənilir. Bundan əlavə, xüsusilə Böyük göllər ətrafında leysan yağışlar və lokal daşqınlar da mümkündür.