Gürcüstanda neftin qanunsuz daşınması şübhəsi ilə Qazaxıstan vətəndaşları həbs olunub

Batumidəki neft terminalının üç rəhbəri milyonlarla dollar dəyərində bəyan edilməmiş neftin qanunsuz daşınmasında şübhəli bilinərək həbs olunub.

"PostMedia" xəbər verir ki, bu barədə Gürcüstanın maliyyə nazirliyinin istintaq xidmətindən "Новости-Грузия" nəşrinə bildirilib.

Agentliyin məlumatına görə, təqsirləndirilən şəxslər terminalın anbarlarında saxlanılan 10 mindən çox ton xam və bəyan edilməmiş nefti daşımışlar. Neftin dəyəri 15 milyon laridən (təxminən 5,5 milyon dollar) çoxdur.

İstintaqa görə, yanacağın itirilməsini gizlətmək məqsədilə onlar anbarların məzmununu faydasız neft tullantıları ilə əvəz ediblər.

"TV Pirveli"nin məlumatına görə, həbs olunanlar Qazaxıstan vətəndaşlarıdır.

"Batumibeli" xəbər verir ki, həbs əməliyyatları uzunmüddətli istintaq tədbirlərindən sonra həyata keçirilib. Terminalın fəaliyyəti faktiki olaraq dünən gecədən dayandırılıb. Onlarla işçi sorğu-sual olunub.

İstintaq davam edir. Maliyyə Nazirliyi bildirib ki, sxemanın digər iştirakçılarını, dövlət büdcəsinə vurulmuş zərəri və ölkəyə qaçaq yolla gətirilmiş neftin taleyini aşkar edəcək.

İş, xüsusilə böyük miqyaslı qaçaqmalçılıq üzrə bir qrup şəxs tərəfindən törədilən cinayət faktı üzrə araşdırılır. Bu maddə ilə nəzərdə tutulmuş cəza 11-15 il həbsdir.

Batumidəki neft terminalı, həmçinin Batumi limanının idarəçiliyini həyata keçirir və 2006-cı ildən Qazaxıstanın dövlət neft şirkəti «KazTransOil» tərəfindən nəzarət olunur. Kompleksin istismar lisenziyası 49 il müddətinə verilib.