Müharibənin başlanmasından bəri İran ABŞ-nin 20 hərbi obyektinə zərər vurub

İran hərbçiləri fevral ayında ABŞ və İsraillə münaqişənin başlanmasından bəri Amerikanın ən azı 20 hərbi obyektinə zərər vurublar.

"PostMedia" xəbər verir ki, bu barədə BBC məlumat yayıb.

Qurumun jurnalistləri peyk görüntülərini və video materialları araşdırıblar.

Məlumatda qeyd olunur ki, İran Yaxın Şərqdə yerləşən səkkiz ölkədəki Amerika obyektlərinə zərbələr endirib. Həmin obyektlər Səudiyyə Ərəbistanı, Birləşmiş Ərəb Əmirlikləri, Qətər, Küveyt, İraq, İordaniya, Bəhreyn və Oman ərazilərində yerləşib. Bəzi analitiklər hesab edirlər ki, zərbələr bu ölkələrdəki ümumilikdə 28 Amerika obyektini əhatə edib.

Xüsusilə, İran BƏƏ və İordaniyadakı aviabazalarda yerləşdirilmiş THAAD raketdən müdafiə sisteminin üç batareyasına zərər vurub. Bundan əlavə, Tehran Səudiyyə Ərəbistanında yerləşən Amerika yanacaq doldurma və kəşfiyyat təyyarələrinə ciddi ziyan vurub.

BBC-nin qeyd etdiyi kimi, ABŞ obyektlərinə vurulan zərərin real miqyasını qiymətləndirmək çətindir. May ayına olan məlumata görə, ABŞ hərbi qurumu olan Pentaqon bildirirdi ki, İrana qarşı hərbi əməliyyatın ümumi dəyəri 29 milyard dollar təşkil edəcək. Bu məbləğin əhəmiyyətli hissəsi münaqişə zamanı məhv edilmiş texnikanın təmiri və ya əvəzlənməsinə yönəldiləcək.

ABŞ Konqresindən bildirilib ki, döyüş əməliyyatları zamanı 42 uçuş aparatı zədələnib və ya tamamilə məhv edilib. Onların arasında "F-35 Lightning II", "F-15 Eagle" və "MQ-9 Reaper" də var.