Belarus Milli Bankı belarus rublu üçün yeni qrafik simvolu təsdiqləyib.
"PostMedia" xarici KİV-lərə istinadən xəbər verir ki, bu simvol aşağı hissəsindən üfüqi xətt keçən böyük kiril “Б” hərfi formasındadır.
Milli Bankın açıqlamasına görə, üfüqi xətt sabitlik və balansı ifadə edir, “Б” hərfi isə ölkənin adı ilə assosiasiya olunur. Yeni işarə sadə yazılışa malikdir, asan tanınır və dünya valyutalarının qrafik simvolları sisteminə uyğun gəlir. Bu da milli valyutaya etimadın və Belarusun müsbət imicinin gücləndirilməsinə xidmət etməlidir.
Simvolun dizayn müsabiqəsində dizayner Vasili Şçebetun qalib gəlib. Müsabiqəyə təxminən 2700 müraciət təqdim olunub. Milli Bank bildirib ki, təxminən 20 il əvvəl qəbul edilən və latın Br hərflərindən ibarət olan əvvəlki simvol geniş istifadə olunmadığı üçün 2025-ci ildə yeni müsabiqə keçirilib.
