Trampın oğlu hərbi dronların istehsalından gəlir əldə etmək istəyir

ABŞ Prezidenti Donald Trampın oğlu Erik Tramp 1,5 milyard dollarlıq sövdələşmə çərçivəsində hərbi təyinatlı pilotsuz uçuş aparatları (PUA) istehsal edən "Xtend" startapına sərmayə yatırır.

"PostMedia" The Wall Street Journal"a istinadən xəbər verir ki, bu razılaşma çərçivəsində şirkət Floridadakı kiçik tikinti firması ilə birləşmə yolu ilə səhmlərini açıq bazara çıxarmağı planlaşdırır.

"Forbes"in məlumatına görə, son illərdə Qəzzada aparılan əməliyyatlarla tanınan İsrail şirkəti "Xtend" dronlarını müasir müharibə konsepsiyalarına uyğun “aşağıbüdcəli silahlar” kimi təqdim edir. Şirkət artıq Floridada istehsal müəssisəsi açıb, Pentaqondan milyonlarla dollarlıq müqavilə alıb və ABŞ Müdafiə Nazirliyinin yeni tədarükçülər üçün keçirdiyi tenderdə iştirak edir.

"Xtend"in baş icraçı direktoru Aviv Şapiranın sözlərinə görə, "JFB Construction" ilə birləşmə şirkətə ABŞ-da istehsalı genişləndirməyə və fond bazarına çıxış əldə etməyə imkan verəcək. Erik Tramp bu sövdələşmədə strateji investor kimi çıxış edir. Bundan başqa, Donald Trampın kiçik oğlu ilə əlaqəli olan "Unusual Machines" şirkəti də layihəyə sərmayə yatırıb və məsləhətçi kimi iştirak edir.

Bu razılaşma Tramp ailəsinin kriptovalyutadan tutmuş istehsal sahəsinədək uzanan geniş maliyyə əməliyyatları zəncirinin bir hissəsidir və mümkün maraqlar toqquşması ilə bağlı yeni müzakirələrə səbəb olub. Bildirilir ki, ötən il "Dominari Holdings" şirkəti "JFB Construction" üçün 44 milyon dollarlıq özəl yerləşdirmə təşkil edib və bu açıqlamadan sonra şirkətin səhmləri 400%-dən çox bahalaşıb.