Gürcüstandan Azərbaycan vətəndaşları da daxil olmaqla 56 əcnəbi deportasiya edilib

Gürcüstan Daxili İşlər Nazirliyinin Miqrasiya Departamentinin əməkdaşları son günlər ərzində Azərbaycan vətəndaşları da daxil olmaqla ümumilikdə 56 xarici ölkə vətəndaşını ölkədən çıxarıblar.

"PostMedia" Gürcüstan KİV-lərinə istinadən xəbər verir ki, deportasiya olunanlar arasında Azərbaycan, Türkiyə, Hindistan, Rusiya, Çin, Qazaxıstan, Türkmənistan, Banqladeş, Pakistan, Misir, İsrail, Kipr, Mərakeş, Nigeriya, Ermənistan və Özbəkistan vətəndaşları var.

Mövcud qanunvericiliyə əsasən, deportasiya edilən şəxslərin Gürcüstana yenidən girişinə qadağa qoyulub։ Gürcüstan DİN-in Miqrasiya Departamentinin əsas vəzifələrindən biri ölkədə qanuni əsas olmadan qalan əcnəbilərin müəyyən edilməsi və intensiv miqrasiya nəzarəti tədbirləri vasitəsilə onların ölkədən çıxarılmasıdır.

Qeyd edək ki, oktyabrın 1-dən “Əcnəbilərin və vətəndaşlığı olmayan şəxslərin hüquqi vəziyyəti haqqında” qanuna edilən dəyişikliklər qüvvəyə minib. Dəyişikliklər qeyri-qanuni miqrasiya ilə mübarizə mexanizmlərinin və ölkə ərazisində miqrasiya nəzarətinin gücləndirilməsini nəzərdə tutur.