Şervud meşəsində Robin Qudun məşhur 1200 illik palıdı quruyub

Böyük Britaniyada Robin Qud əfsanəsi ilə bağlı məşhur “Major Oak” adlı qədim palıd ağacının quruması barədə məlumat verilib.

"PostMedia" xəbər verir ki, bu barədə "Associated Press" xəbər yayıb.

Kral Quşların Mühafizəsi Cəmiyyətinin (RSPB) məlumatına görə, təxminən 1200 illik ağac bu yaz yarpaq verməyib və bu, onun tam quruma mərhələsinə keçdiyinin göstəricisi hesab olunur.

“Major Oak” Nottingem yaxınlığındakı Şervud meşəsində yerləşir və İngiltərənin ən məşhur təbii simvollarından biri sayılır. Əfsanəyə görə, məhz bu ağacın altında orta əsr xalq qəhrəmanı Robin Qud gizlənib — “zənginlərdən alıb kasıblara verən” məşhur quldur obrazı.

RSPB bildirir ki, ağacın qurumasına bir neçə amil səbəb ola bilər, o cümlədən uzun illər davam edən turist təzyiqi, torpağın sıxlaşması və ekosistemin dəyişməsi.

“Bu il ağacda yarpaqların olmaması hamı üçün çox kədərli xəbərdir”, – deyə RSPB nümayəndəsi Holli Dreyk bildirib.

Ekoloqların sözlərinə görə, əsrlər boyu milyonlarla ziyarətçi ağacın kökləri ətrafındakı torpağı sıxlaşdıraraq suyun keçməsini çətinləşdirib. Bundan əlavə, iqlim dəyişikliyi, quraqlıq və isti dalğaları, eləcə də ağacın iri budaqlarının dirəklər və kəndirlər vasitəsilə dəstəklənməsi kimi insan müdaxilələri də təsir göstərmiş ola bilər.

Mütəxəssislər ağacın kök sisteminin “boğulmuş və qida çatışmazlığı içində” vəziyyətə düşdüyünü bildirirlər.

Woodland Trust təşkilatının eksperti Ed Peyn bu cür ağacları “Böyük Britaniyanın ekoloji ağ kərgədanları” ilə müqayisə edərək onların tədricən və çox vaxt hiss olunmadan məhv olduğunu vurğulayıb.

“Belə ağacların xilas edilməsi ekosistemin sağlamlığı üçün həyati əhəmiyyət daşıyır, lakin onların böyük hissəsi lazımi diqqət olmadan səssiz şəkildə yox olur”, – deyə o bildirib.

Şervud meşəsi həmçinin Admiral Nelson dövründə Britaniya donanması və Londonun Müqəddəs Pavel kafedralının damı üçün ağac materialı mənbəyi kimi də tanınır.

“Major Oak” 1970-ci illərdə hasara alınaraq qoruma altına alınsa da, ekoloqlar bunun təbii və insan təsirlərinin tam qarşısını almağa kifayət etmədiyini bildirirlər.