"Azərpoçt"un sədr müavini işdən çıxıb, sabiq rəhbərinin müşaviri oldu

Azərbaycan Nəqliyyat və Kommunikasiya Holdinqinin (AZCON) tabeliyindəki şirkətlərdən olan "Azərpoçt" MMC-nin rəhbərliyində növbəti dəyişiklik olub.

"PostMedia" Plat.az-a istinadən xəbər verir ki, qurumun idarə heyətinin sədrinin müavini Xəyyam Əlizadə vəzifəsindən ayrılıb.

O, Azərbaycan Nəqliyyat və Kommunikasiya Holdinqinin (AZCON) tabeliyindəki şirkətlərdən olan “Azərbaycan Xəzər Dəniz Gəmiçiliyi” QSC-nin (ASCO) idarə heyətinin sədrinə müşavir təyin edilib.

Qeyd edək ki, X.Əlizadə 2021-ci ildə "Azərpoçt"da baş direktorun müavini təyin edilib. Həmin vaxtlarda "Azərpoçt"un rəhbəri hazırda “Azərbaycan Xəzər Dəniz Gəmiçiliyi” QSC-nin (ASCO) idarə heyətinin sədri olan Əfqan Cəlilov olub. 2022-ci ildə şirkətin idarəetmə forması dəyişdiriləndən sonra X.Əlizadə qurumda idarə heyətinin sədrinin müavini vəzifəsini tutub.

Xatırladaq ki, bundan bir müddət öncə (bu ilin aprel ayında) "Azərpoçt"un idarə heyətinin sədri İsi Mustafayev vəzifəsindən ayrılıb. Onun yerinə Manaf Babayev qurumun idarə heyətinin sədri təyin edilib.