Rusiya Azərbaycandan idxal edilən xurmalarda zərərvericilər aşkar edib

Yekaterinburqdakı meyvə-tərəvəz anbarına gətirilən məhsulların yoxlanışı zamanı Rosselxoznadzorun (Baytarlıq və Fitosanitar Nəzarət üzrə Federal Xidmət) Ural üzrə regionlararası idarəsinin əməkdaşları xurmanın içində Kaliforniya qalxanvari zərərvericinin sürfələrini aşkarlayıblar.

"PostMedia" xəbər verir ki, Sverdlovsk vilayətinə Azərbaycandan 21 ton meyvə idxal olunub.

Karantin zərərvericinin mövcudluğu laborator analizlərlə təsdiqlənib. Qeyd edilib ki, qalxanvari zərərverici əsasən ting və əkin materialı vasitəsilə yayılır və yoluxmuş meyvə ciddi təhlükə yaratmır. Bu səbəbdən Rosselxoznadzor xurmanın satışına icazə verib.