ABŞ Mərkəzi Komandanlığı İran dəniz nəqliyyatı üzrə blokadanın dayandırıldığını elan edib

ABŞ Mərkəzi Komandanlığı (CENTCOM) ABŞ prezidentinin göstərişinə uyğun olaraq İran limanları və sahilyanı ərazilərlə bağlı dəniz nəqliyyatının bloklanmasına dair bütün əməliyyatların dayandırıldığını elan edib.

"PostMedia" xəbər verir ki, bu barədə CENTCOM-un yaydığı bəyanatda qeyd olunur.

Məlumata görə, ABŞ qüvvələri artıq Fars və Oman körfəzlərində İran limanlarına daxil olan və oradan çıxan gəmilərin hərəkətinə mane olmur.

“Bu gün ABŞ qüvvələri prezidentin göstərişi ilə İran limanlarına və sahil bölgələrinə daxil olan və çıxan bütün dəniz nəqliyyatına tətbiq edilən blokadanı ləğv edib. ABŞ hərbi qüvvələri Fars və Oman körfəzlərində gəmilərin tranzitinə mane olmur. ABŞ Silahlı Qüvvələri tərəfindən blokadanın təmin olunmasına yönəlmiş bütün tədbirlər dayandırılıb. Böyük hərbi gəmilərimiz regionda qalacaq ki, razılaşmanın bütün aspektlərinin yerinə yetirilməsi təmin edilsin və tam şəkildə qüvvədə qalsın”, — deyə bəyanatda bildirilir.

Eyni zamanda vurğulanır ki, ABŞ hərbi gəmiləri regionda mövcudluğunu davam etdirəcək və razılaşmanın icrasına nəzarət edəcək, həmçinin bütün tərəflərin öhdəliklərə əməl etməsini təmin edəcək.