Viktor Yanukoviç barəsində çıxarılan hökm qüvvəyə minib

"RBK-Ukrayna"nın Baş Prokurorluğa istinadən verdiyi məlumata görə, Ukraynanın keçmiş prezidenti Viktor Yanukoviçin 15 il müddətinə azadlıqdan məhrum edilməsi barədə hökm qüvvəyə minib. Qərarı Kiyev Apellyasiya Məhkəməsi qəbul edib; məhkəmə müdafiə tərəfinin şikayətlərini rədd edərək Kiyevin Podolsk Rayon Məhkəməsinin qərarını qüvvədə saxlayıb.

Apellyasiya iclası zamanı Baş Prokurorluğun prokurorları ittiham tərəfinin mövqeyini tam müdafiə ediblər. Məhkəmə Yanukoviçi şəxslərin Ukrayna dövlət sərhədindən qanunsuz keçməsini təşkil etməkdə və fərariliyə təhrik etməkdə təqsirli bilinib.

Hökm bir neçə cinayət üzrə, Kiyevin Obolon Rayon Məhkəməsinin 24 yanvar 2019-cu il tarixli əvvəlki qərarı nəzərə alınmaqla təyin edilib. Həmin qərarla keçmiş prezident dövlətə xəyanət və Rusiya Federasiyasına Ukraynaya qarşı müharibə aparmaqda kömək etmək ittihamı ilə 13 il müddətinə azadlıqdan məhrum edilmişdi.

Ukrayna Dövlət Mühafizə İdarəsi rəisinin keçmiş müavini – Prezidentin Mühafizə Xidmətinin rəhbəri barəsindəki hökm də qüvvəyə minib. O, şəxslərin sərhəddən qanunsuz keçməsini və fərariliyi təşkil etməkdə təqsirli bilinərək 10 il müddətinə azadlıqdan məhrum edilib.

Məhkəmə müəyyən edib ki, 23 fevral 2014-cü ildə Yanukoviç, Prezidentin Mühafizə Xidmətinin keçmiş rəhbəri ilə razılaşaraq və Rusiya Federasiyası nümayəndələrinin köməyi ilə hava yolu vasitəsilə Ukrayna dövlət sərhədini qanunsuz keçib. O, yaxın ətrafından olan azı 20 nəfərin və hərbi qulluqçuların daşınmasını təşkil edib.

Uçuş keçid məntəqələrindən kənarda baş tutub: üç Rusiya hərbi helikopteri Donetsk vilayətinin Urzuf kəndinin kənarından Rusiyanın Yeysk şəhərindəki hərbi aerodroma uçub. Daha sonra marşrut Anapadan keçib, oradan isə Yanukoviç Rusiya hərbi-nəqliyyat təyyarəsi ilə Krımın Qvardeyskoye aerodromuna aparılıb.

Keçmiş prezident sonradan Ukraynanı birdəfəlik tərk etmək qərarına gəlib. Sevastopolda, Rusiya Qara Dəniz Donanmasının hərbi hissəsində məskunlaşaraq hərbi qulluqçuları fərariliyə sövq edib. Onlardan bəziləri Yanukoviçlə birlikdə dəniz yolu ilə Rusiyaya gedib və bir daha Ukraynada xidmət etmək üçün geri qayıtmayıblar.

İstintaqın məlumatına görə, qaçqın prezidentin marşrutu tamamilə Rusiya Federal Mühafizə Xidmətinin zabitləri və Cənub Hərbi Dairəsinin hərbi qulluqçuları tərəfindən nəzarət və müşayiət olunub, həmçinin birbaşa Rusiya Prezidenti ilə razılaşdırılıb.