Uralda azərbaycanlı icmasının keçmiş rəhbərinin məhkəməsi iki həftə təxirə salınıb

Uralda azərbaycanlı icmasının keçmiş rəhbəri Şahin Şixlinski və onunla əlaqəsi ehtimal olunan şəxsləri barəsində açılmış cinayət işi üzrə məhkəmə prosesi iki həftəlik təxirə salınıb.

"PostMedia" xəbər verir ki, bu barədə "ura.ru"ya Sverdlovsk vilayəti məhkəmələrinin birləşmiş mətbuat xidməti məlumat verib.

Məhkəmə iclası martın 5-də davam etdiriləcək. Hökmün isə böyük ehtimalla yaz aylarında elan ediləcəyi bildirilir. Fevralın 17-də dövlət ittihamçısı təqsirləndirilən şəxslər üçün cəza tələb edib. Şixlinski üçün 23 il azadlıqdan məhrumetmə cəzası istənilib.

Daha əvvəl andlı iclasçılar kollegiyası ittihamedici hökm çıxarıb. Şixlinski ilə birlikdə beş Safarov qardaşı və Şücayəddin Rəcəbov da müttəhimlər kürsüsündədir.