Cənubi Koreyanın keçmiş birinci xanımı dəbdəbəli hədiyyələrə görə 20 ay həbs cəzasına məhkum edilib

Cənubi Koreya məhkəməsi keçmiş birinci xanım Kim Keon Hini Birləşmə Kilsəsindən biznes xidmətləri qarşılığında “dəbdəbəli rüşvətlər” almaqda təqsirli bilərək 1 il 8 ay müddətinə azadlıqdan məhrum edib.

"PostMedia" xəbər verir ki, bu barədə Yonhap agentliyi məlumat yayıb.

Xüsusi prokuror Min Çjun Kinin komandası, 2024-cü ildə hərbi vəziyyətin tətbiqi təklifi ilə bağlı üsyanın təşkili ittihamı üzrə məhkəmə qarşısına çıxarılan və vəzifədən uzaqlaşdırılmış keçmiş prezident Yun Sok Yolun həyat yoldaşı Kim üçün 15 il həbs cəzası tələb etmişdi.

Lakin Seulun Mərkəzi Rayon Məhkəməsi keçmiş birinci xanıma daha yüngül cəza verib və onu səhm manipulyasiyası sxemində iştirak və siyasi fondlar haqqında qanunun pozulması ilə bağlı ittihamlardan azad edib.

Məhkəmə həmçinin Kimi 12,8 milyon von (təxminən 8 988 ABŞ dolları) məbləğində cərimə ödəməyə məcbur edib. Çərşənbə günü çıxarılan hökmə əsasən, Kim və həyat yoldaşı ölkədə cinayət ittihamları ilə həbs olunan ilk prezident cütlüyü olublar.

Məhkəmə bildirib ki, Kim Birləşmə Kilsəsindən Chanel çantası və bahalı Graff boyunbağı kimi dəbdəbəli əşyaları qəbul etməkdə təqsirli bilinib; kilsə bu yolla ondan biznes xidmətləri gözləyib.