ABŞ Silahlı Qüvvələri İranın altı motorlu qayığını batırıb - CENTCOM

ABŞ Mərkəzi Komandanlığının (CENTCOM) rəhbəri admiral Bred Kuper bildirib ki, ABŞ Silahlı Qüvvələri ticarət gəmiçiliyinə mane olmağa çalışan İranın altı motorlu qayığını batırıb. Onun sözlərinə görə, həmçinin Hörmüz boğazının açılmasına yönəlmiş “Azadlıq” layihəsi çərçivəsində İranın qanadlı raketləri və pilotsuz uçuş aparatları da zərərsizləşdirilib.

"PostMedia" xəbər verir ki, bu barədə "The Mirror" məlumat paylaşıb.

Kuper qeyd edib ki, o, İran qüvvələrinə əməliyyat zamanı ABŞ-ın hərbi obyektlərindən uzaq durmağı “qəti şəkildə tövsiyə edir” və əlavə edib ki, ABŞ İran limanlarının dəniz blokadasını davam etdirir, bu blokada isə “gözləntiləri üstələyib”.

Komandan vurğulayıb ki, İslam İnqilabı Keşikçiləri Korpusu ticarət gəmilərinə doğru raketlər və PUA-lar buraxıb, ABŞ isə bu gəmilərin müdafiəsini təmin edib.

“‘Azadlıq’ layihəsi müdafiə xarakterli əməliyyatdır və biz raketdən müdafiə sistemləri ilə təchiz olunmuş gəmilər yerləşdirmişik. Fars körfəzindəki sularında 87 ölkəyə məxsus gəmilər var və biz onları boğazdan keçməyə çağırırıq”, — deyə o bildirib və əlavə edib ki, ABŞ İranın hücumlarına qarşı tədbirləri davam etdirəcək.