Yuxu və intim yaxınlıq: yatmazdan əvvəl yaxınlıq dərin istirahəti təmin edir

Əgər yuxuya getməkdə çətinlik çəkirsinizsə, yatmazdan əvvəl bir qədər intim yaxınlıq sakit və dolğun gecənin açarı ola bilər. Burada təkcə fiziki aktivlikdən söhbət getmir: sevilən insanla yaxınlıq yaxşı əhval-ruhiyyə hormonlarının ifrazını stimullaşdırır, bu da rahatlamağa və daha tez yuxuya getməyə kömək edir.

"PostMedia"nın məlumatına göə, doktor Kristen Holms izah edir ki, cinsi aktivlik və yuxu niyə bu qədər sıx bağlıdır. “Müəyyən mənada intim yaxınlıq alkoqola bənzəyir – rahatladır və yaxınlıq, sakitlik mühiti yaradır. Həyəcan və orqazm zamanı bir sıra neyrokimyəvi maddələr ifraz olunur ki, bunlar zövq, etibar və emosional bağ hissi yaradır. Bu təsirlər orqazm zamanı zirvəyə çatır.”

Bunlara stressi azaldan və “sevgi hormonu” kimi tanınan oksitosin, həmçinin əhval-ruhiyyəni yaxşılaşdıran və rahatlamaya kömək edən serotonin daxildir. Orqazm zamanı həm kişilərdə, həm də qadınlarda prolaktin ifraz olunur ki, bu da müvəqqəti olaraq həyəcanı azaldır və rifah hissi yaradır.

“İntim yaxınlıq və yuxu həqiqətən qarşılıqlı bağlıdır: yaxınlığın keyfiyyəti nə qədər yüksəkdirsə, yuxunuz da bir o qədər yaxşı olur və əksinə”, – deyə doktor Holms əlavə edir.

Elmi araşdırmalar bunu təsdiqləyir. “Journal of Sexual Medicine” jurnalında dərc olunan 43 tədqiqatın 2023-cü il icmalı cinsi aktivliyin tezliyi ilə yuxunun keyfiyyəti arasında birbaşa əlaqə aşkar edib. Keçən il rəqəmsal yuxu izləyicilərindən istifadə edilən təcrübə zamanı, yatmazdan əvvəl intim yaxınlıq yaşayan və ya fərdi stimullaşdırma edən iştirakçıların gecə ərzində daha az oyandığı və daha dərin yuxuya getdiyi müşahidə olunub.

Yuxu effektivliyi (yataqda keçirilən vaxta nisbətdə real yuxu müddəti) 93,4%-ə qədər yüksəlib ki, bu da daha keyfiyyətli istirahətdən xəbər verir.

Təsir xüsusilə qadınlarda daha güclü olub: intim yaxınlıqdan sonra onlar daha uzun müddət yatıb və gecə daha az oyanıblar. Bu nəticələr uzun müddət mövcud olan, kişilərin orqazmdan dərhal sonra yuxuya getdiyi, qadınların isə oyaq qaldığı barədə stereotipi də şübhə altına alır.