Lavrov: "Avropa İttifaqı, NATO və ATƏT öz dövrünü başa vurur"

Avropa İttifaqı, NATO və ATƏT artıq öz dövrünü başa vurur, dünyada isə vahid Avrasiya təhlükəsizlik arxitekturasının yaradılmasına maraq getdikcə artır.

"PostMedia" xəbər verir ki, bu barədə Rusiya xarici işlər naziri Sergey Lavrov bazar ertəsi "TV BRICS"ə müsahibəsində bildirib.

Lavrov qeyd edib ki, NATO-nun SSRİ-yə verdiyi və yerinə yetirilməyən şərqə doğru genişlənməmək vədləri, Avropa İttifaqının Rusiya ilə əməkdaşlıq üçün qurulmuş geniş infrastrukturu dağıtması və ATƏT-in Qərbin birtərəfli addımlarına tam tabe olaraq konsensus prinsipini unutması bu qurumların aktuallığını itirməsinə səbəb olub.

Nazir vurğulayıb ki, dünyada Moskvanın irəli sürdüyü və ŞƏT, Aİİ və ASEAN kimi təşkilatların formalaşdırdığı Böyük Avrasiya tərəfdaşlığına əsaslanan yeni Avrasiya təhlükəsizlik strukturunun yaradılması təşəbbüsünə maraq artır.

Onun sözlərinə görə, regional və subregional birliklər arasında əlaqələr nə qədər möhkəm olarsa, vahid və ümumi təhlükəsizlik modelinin qurulması üçün zəmin də bir o qədər güclü olacaq.