Rusiya XİN rəhbəri MDB səfirləri, o cümlədən Azərbaycan səfiri ilə görüşüb
27-yanvar-2026
Admin
Yazı Ölçüsü:
Yanvarın 27-də Rusiyanın xarici işlər naziri Sergey Lavrov Moskvada Müstəqil Dövlətlər Birliyinin (MDB) üzv ölkələrinin akkreditə olunmuş səfirləri ilə ənənəvi görüş keçirib.
"PostMedia" xəbər verir ki, bu barədə Rusiya XİN-in mətbuat xidməti məlumat yayıb.
Görüşdə həmçinin MDB-nin baş katibi Sergey Lebedev və digər Avrasiya strukturlarının icraçı orqanlarının rəhbərləri iştirak ediblər.
Dostluq şəraitində keçən görüşdə tərəflər aktual beynəlxalq məsələlər ətrafında fikir mübadiləsi aparıb və 2025-ci il üzrə Avrasiya inteqrasiya birlikləri çərçivəsində çoxtərəfli əməkdaşlığın yekunlarını müzakirə ediblər.
Xarici siyasətin koordinasiyasının gücləndirilməsi, ticarət-iqtisadi, mədəni-humanitar sahələrdə əməkdaşlığın genişləndirilməsi və regional təhlükəsizliyin təmin edilməsi qarşıdakı əsas məqsədlər kimi müəyyən edilib.
Qeyd edək ki, yayımlanan fotolara əsasən, görüşdə Azərbaycanın Rusiyadakı səfiri Rəhman Mustafayev da iştirak edib.