ABŞ kibermüharibə üçün ayrıca silahlı qüvvə növünün yaradılmasını müzakirə edir

ABŞ ekspert icmasında ABŞ Kiber Komandanlığının (USCYBERCOM) islahatı və hətta Kosmik Qüvvələrə bənzər ayrıca kiberqüvvənin – Silahlı Qüvvələrin müstəqil bir növünün yaradılması zərurəti ilə bağlı müzakirələr kəskinləşib.

"PostMedia" xəbər verir ki, bu mövzu ABŞ Ordusunun Kiber İnstitutunun nəşr etdiyi "The Cyber Defense Review" jurnalının xüsusi buraxılışının əsas mövzusuna çevrilib.

Nəşrin müəllifləri mövcud kiberqüvvə modelində ciddi problemlərin olduğunu vurğulayırlar. Bunlara kadr çatışmazlığı, mütəxəssislərin hazırlanması və saxlanmasında çətinliklər, eləcə də mürəkkəb komandanlıq və nəzarət sistemi daxildir. Bildirilir ki, ABŞ Silahlı Qüvvələrində CYBERCOM 2.0 islahat proqramının icrası ciddi maneələrlə üzləşir.

Redaksiya məqaləsində qeyd olunur ki, mövcud silahlı qüvvə strukturları kiberməkan üçün uyğun deyil. Doktrina da yanlış hesab edilir, çünki kiberəməliyyatlar tez-tez elektron müharibə ilə birləşdirilir və müstəqil döyüş meydanı kimi deyil, yalnız kinetik əməliyyatlara dəstək vasitəsi kimi qiymətləndirilir.

Bir sıra ekspertlər, o cümlədən mayor Nik Stark və polkovnik Tod Arnold, alternativ təşkilati modellərin, xüsusilə ayrı bir kiberxidmət növünün yaradılmasının nəzərdən keçirilməsini təklif edirlər. Digər ekspertlər — tarixçilər Maykl Uorner və Emili Qoldman isə radikal dəyişikliklərin bürokratikləşməyə və real döyüş missiyaları ilə əlaqənin zəifləməsinə səbəb ola biləcəyi barədə xəbərdarlıq edirlər.

Qeyd edək ki, ABŞ Kiber Komandanlığı 2009-cu ildə, 2008-ci ildə Pentaqonun məxfi şəbəkələrinin sındırılması ilə nəticələnən Buckshot Yankee insidentindən sonra yaradılıb. O vaxtdan bəri qurumun nüfuzu və büdcəsi əhəmiyyətli dərəcədə artsa da, artan kiber təhlükələr fonunda onun struktur effektivliyi ilə bağlı suallar aktuallığını qoruyur.