Türkiyə Orta Dəhlizin inkişafı üzrə işləri fəallaşdırmağı təklif edir

Ankara Tehranın Beynəlxalq Transxəzər Nəqliyyat Marşrutu, yəni Orta Dəhlizin inkişafı üzrə işləri fəallaşdırmağı təklif edir və ABŞ ilə Avropa İttifaqının bu marşruta marağını görür.

"PostMedia" xəbər verir ki, bunu Aşqabadda keçirdiyi mətbuat konfransında Türkiyənin səfiri Əhməd Demirok bildirib.

“Transxəzər nəqliyyat dəhlizi özünü təhlükəsiz və praktik marşrut kimi göstərib. Biz ABŞ və Avropa İttifaqının bu dəhlizə marağının son vaxtlar artmasını məmnuniyyətlə qeyd edirik. Hərçənd Türkmənistan Mərkəzi Asiya bazarlarına Türkiyə məhsullarının çatdırılması üçün vacib marşrut olsa da, Türkiyə Türkmənistan üçün Avropaya nəqliyyat baxımından əhəmiyyətli rol oynayır. Bu çərçivədə hesab edirik ki, Orta Dəhlizin effektivliyini artırmaq üçün multimodal daşımaların inkişafı, ikitərəfli və üçtərəfli səviyyədə əməliyyatların sadələşdirilməsi və sürətləndirilməsi, o cümlədən Azərbaycanla əməkdaşlıq üzrə səylərimizi fəallaşdırmaq vacibdir”, – səfir bildirib.

Demirok əlavə edib ki, Türkiyə Türkmənistanın nəqliyyat-logistika infrastrukturunun inkişafı üzrə səylərini yüksək qiymətləndirir. “Türkiyə podratçı şirkətlərinin həyata keçirdiyi Türkmənbəşidəki Beynəlxalq Dəniz Limanı böyük logistika potensialına malikdir. Bu fürsətdən istifadə edərək vurğulamaq istəyirəm ki, Xəzər dənizində nəqliyyat-dəniz infrastrukturunun inkişafı üzrə səylər çərçivəsində hər zaman əməkdaşlığa hazırıq”, – o deyib.

Transxəzər Beynəlxalq Nəqliyyat Marşrutu (Orta Dəhliz) Çin, Qazaxıstan, Xəzər dənizi akvatoriyası, Azərbaycan, Gürcüstan və daha sonra Avropa ölkələri ərazisindən keçir. Bu marşrut üzrə konteyner daşımaları dəmiryolu və dəniz nəqliyyatından istifadə etməklə həyata keçirilir.