Rusiyada yaşayan həmyerlilərimizin diqqətinə: Bu sənədlər ləğv edilir

Rusiya Daxili İşlər Nazirliyi əcnəbi vətəndaşlar üçün miqrasiya kartlarının istifadəsindən imtina etməyi təklif edib.

"PostMedia" xəbər veirr ki, müvafiq qanun layihəsi normativ hüquqi aktların layihələri portalında yerləşdirilib.

Nazirlikdə bildirilib ki, miqrasiya kartları əvvəllər ölkədə əcnəbilərin müvəqqəti qalmasına nəzarət üçün istifadə olunurdu, lakin hazırda bu funksiyaları digər mexanizmlər yerinə yetirir.

Alternativ vasitələr kimi 2024-cü ildə başlanan biometrik məlumatların toplanması eksperimenti, səfərdən 72 saat əvvəl “RuID platforması” vasitəsilə giriş müraciətinin edilməsi, nəzarət olunan şəxslərin reyestrinin yaradılması və “Rəqəmsal xarici vətəndaş profili” sisteminin hazırlanması göstərilib.

Nazirlik vurğulayıb ki, bu addım müxtəlif qurumlar arasında funksiyaların təkrarlanmasının qarşısını alacaq və nəzarətin səmərəliliyini artıracaq.

Bundan əlavə, təşəbbüsün həyata keçirilməsi büdcə xərclərinin azalmasına da səbəb olacaq. Hesablamalara görə, miqrasiya kartlarının çapına çəkilən illik xərclər təxminən 13,8 milyon rubl azalacaq.

Nazirliyin rəsmi nümayəndəsi İrina Volk qeyd edib ki, dəyişikliklər Rusiyada əcnəbilərin qalmasına nəzarət sisteminin optimallaşdırılmasına yönəlib.