Paşinyan yenidən Əliyevə təşəkkür etdi

"Artıq səkkiz aydır ki, Ermənistan–Azərbaycan sərhədində tam sülh hökm sürür. 2025-ci il isə müstəqilliyimizdən, yəni 1991-ci ildən bəri ilk təqvim ili oldu ki, Ermənistan–Azərbaycan sərhədində atışmalar nəticəsində nə ölən, nə də yaralanan olub".

"PostMedia" xəbər verir ki, bunu martın 11-də Strasburqda Avropa Parlamentində çıxışı zamanı Ermənistanın baş naziri Nikol Paşinyan bildirib.

O, Azərbaycan Prezidenti İlham Əliyevə təşəkkür etməyi də unutmayıb:
“Artıq aylardır sərhədyanı yaşayış məntəqələrinin sakinləri atəş səsləri eşitmirlər. Üstəlik, müstəqillikdən bəri ilk dəfə olaraq 2025-ci ilin noyabrında Azərbaycan ərazisindən, həmçinin Gürcüstandan keçərək Ermənistan Respublikasına qatar gəldi. Bu, 2025-ci ilin oktyabrında Azərbaycan Prezidenti Ilham Aliyev Azərbaycanın ərazisindən Ermənistana dəmir yolu daşımalarına qoyulan məhdudiyyətlərin ləğv edildiyini elan etdikdən sonra baş verdi və mən bu qərara görə Azərbaycan Prezidentinə təşəkkür edirəm.

Biz də öz növbəmizdə bəyan etmişik ki, artıq bu gün Azərbaycanın Türkiyəyə və əks istiqamətdə tranzit daşımalarını təmin etməyə hazırıq, çünki bunu mövcud yollarımız vasitəsilə hazırda edə bilərik.

Nə Azərbaycan, nə də Türkiyə hələlik bu imkandan istifadə etməyib. Güman edirəm ki, bunun səbəbi belə bir həllin bəlkə də TRIPP layihəsinin həyata keçirilməsinin ləngiməsinə gətirib çıxara biləcəyi barədə düşünmələridir.

Bu tribunadan rəsmi şəkildə bəyan edirəm ki, Ermənistanın TRIPP layihəsinin həyata keçirilməsini ləngitmək nə niyyəti, nə də səbəbi var. Çünki bu layihə Ermənistan Respublikasının qısamüddətli, orta müddətli və uzunmüddətli maraqlarına tam uyğundur və gördüyünüz kimi, yuxarıda gətirilən sitatlardan da aydın olur ki, bu, heç bir şəkildə Ermənistan Respublikasının suverenliyini, ərazi bütövlüyünü və yurisdiksiyasını azaltmır”.