İranda davam edən münaqişə qlobal kükürd tədarükündə pozuntulara səbəb olub - FT

İranda davam edən münaqişə qlobal kükürd tədarükündə pozuntulara səbəb olub və artıq qiymətlərin artmasına gətirib çıxarıb.

"PostMedia" xəbər verir ki, bu barədə "Financial Times" qəzeti ekspertlərə istinadən yazır.

Nəşrin məlumatına görə, Hörmüz boğazı vasitəsilə həyata keçirilən dəniz daşımaları demək olar ki, dayanıb. Bu isə neft və qaz emalının yan məhsulu olan kükürdün tədarükünü məhdudlaşdırıb. Həmin resurs gübrələrin, kimyəvi maddələrin, metallurgiya məhsullarının və mikroçiplərin istehsalında geniş istifadə olunur.

Ən böyük istehlakçı olan Çinin bazarında bir ton kükürdün qiyməti münaqişənin başlanmasından bəri 15% artaraq rekord səviyyə — 4,65 min yuan (təxminən 672 dollar) olub.

"CRU Group" analitiklərinin qiymətləndirməsinə görə, Fars körfəzi ölkələri kükürdün qlobal ixracının təxminən 45%-ni təmin edir. Ekspertlər bildirirlər ki, tədarükdə yaranan fasilələr qlobal tədarük zəncirlərinə təzyiqi artıra və gübrə, metallurgiya və elektronika sənayesində məhsulların qiymətlərinin daha da yüksəlməsinə səbəb ola bilər.